Kiçik Kennedi müstəqil namizəd kimi 2024-cü il seçkilərində iştirak etmək niyyətindədir
Bakı, 30 sentyabr, AZƏRTAC
Kennedinin müstəqil namizəd kimi seçki meydanına atılması həm demokrat Co Bayden, həm də onun ehtimal edilən rəqibi respublikaçı Donald Tramp üçün mürəkkəb vəziyyət yarada bilər.
AZƏRTAC Amerika KİV-ə istinadən xəbər verir ki, demokrat kiçik Robert Kennedi cümə günü axşam qarşıdan gələn 2024-cü il prezident seçkilərində namizədliyini müstəqil olaraq irəli sürəcəyini bəyan edib. Bu, həm demokrat Co Bayden, həm də respublikaçı Donald Tramp üçün vəziyyəti çətinləşdirə bilər.
Senator Robert Kennedinin oğlu və prezident Con Kennedinin qardaşı oğlu olan kiçik Kennedi özünün yutub kanalında video yerləşdirərək 9 oktyabrda mühüm açıqlama verəcəyini bildirib. Amerikalılara müraciətin Filadelfiyada ediləcəyi gözlənilir.
“Mən Amerika siyasətində köklü dəyişikliklərdən bəhs edəcəyəm” deyən kiçik Kennedi hər iki partiyada mövcud olan korrupsiya hallarını pisləyib.
Qeyd edək ki, keçmiş prezident Con Kennedi 1963-cü ildə Dallasda öldürülüb, onun qardaşı Robert - kiçik Robert Kennedinin atası isə 1968-ci ildə prezident seçkiləri ərəfəsindəki öz seçki kampaniyası zamanı qətlə yetirilib.
Demokratlar kiçik Kennedinin öz namizədliyini irəli sürməsinin seçkilərdə 80 yaşlı Baydenin səslərinin əlindən çıxmasından narahat olduqlarını bildirirlər. Müstəqil namizədin reytinqi demokratlarla müqayisədə respublikaçılar arasında daha yüksəkdir. Onun 2024-cü il seçkilərində iştirakı D.Tramp üçün də təhlükə yaradır. Eks-prezidentə qarşı bir neçə cinayət ittihamı irəli sürülüb və hal-hazırda kampaniya fondundakı vəsait məhkəmə çəkişmələrinə sərf olunur.
Bölmənin digər xəbərləri
