Kolumbiyada ölkəmizin müstəqilliyinin 107-ci ildönümü ilə əlaqədar təntənəli qəbul təşkil olunub
Bakı, 27 may, AZƏRTAC
28 May – Müstəqillik Günü və “Konstitusiya və Suverenlik İli” ilə əlaqədar Kolumbiyanın paytaxtı Boqota şəhərində təntənəli qəbul keçirilib.
Azərbaycanın Kolumbiyadakı səfirliyindən AZƏRTAC-a bildirilib ki, tədbirdə bu ölkənin dövlət və hökumət nümayəndələri, konqresmenlər, Boqotada fəaliyyət göstərən akademik dairələrin və diplomatik korpusun üzvləri, yerli medianın və Azərbaycan icmasının təmsilçiləri iştirak ediblər.
İki ölkə arasındakı dostluq əlaqələrinin təcəssümü olaraq Kolumbiya tərəfi qonaqların qarşılanması üçün Prezident Qvardiyasının protokol əsgərlərini ayırıb, o cümlədən hər iki ölkənin Dövlət himnləri Qvardiyanın musiqiçiləri tərəfindən canlı ifa edilib.
Ölkəmizin Kolumbiyadakı səfiri Məmməd Talıbov Şərqdə ilk dünyəvi və demokratik respublika olan Azərbaycan Xalq Cümhuriyyətinin müstəqilliyinin elan edilməsinin zəngin dövlətçilik tariximizdə tutduğu əhəmiyyətli rolu qeyd edib. Müstəqilliyinin bərpasından sonra qarşılaşdığı çoxsaylı çətinliklərin öhdəsindən layiqincə gələrək, bu gün Azərbaycanın suveren, firavan və inkişaf edən bir ölkə olaraq beynəlxalq aləmdə yüksək nüfuz və söz sahibinə çevrildiyini vurğulayıb.
2025-ci ilin Azərbaycanda “Konstitusiya və Suverenlik İli” elan edilməsinin əsasları barədə məlumat verən diplomat ölkəmizin sülh gündəliyinə hər zaman sadiq qaldığına diqqət çəkib, regionda dayanıqlı sülhün əldə edilməsi üçün beynəlxalq ictimaiyyətin Ermənistanı əməli addımlar atmağa çağıracağına ümidvar olduğunu bildirib.
Səfir Ermənistanın mina terroru fonunda öz doğma torpaqlarından didərgin salınmış insanların layiqli və təhlükəsiz qayıdışının təmini məqsədilə Azərbaycan Hökuməti tərəfindən həyata keçirilən genişmiqyaslı bərpa-quruculuq işlərindən danışıb. O, ölkəmizin Avropanın enerji təhlükəsizliyində artan roluna toxunmaqla yanaşı, son illərdə enerji keçidi, iqlim dəyişikliyi ilə mübarizə və yaşıl enerjinin ixracı üzrə qazandığı nəzərəçarpan nailiyyətlərdən söz açıb. Eyni zamanda, COP29-un ən uğurlu COP-lardan biri kimi tarixə düşdüyünə diqqət çəkib, konfransın yekununda əldə olunmuş müsbət nəticələrə toxunub.
M.Talıbov Azərbaycan-Kolumbiya münasibətlərinin inkişafı ilə bağlı müşahidə olunan müsbət dinamikanın məmnunluq doğurduğunu bildirib, mədəniyyət, təhsil, humanitar, iqlim dəyişikliyi və ətraf mühitin mühafizəsi daxil olmaqla, bir çox istiqamətlər üzrə, o cümlədən iki ölkənin qanunvericilik orqanları arasında səmərəli əməkdaşlıq əlaqələrinin qurulduğunu diqqətə çatdırıb.
Sonra çıxış edən Kolumbiya Xarici İşlər Nazirliyinin Avropa idarəsinin rəisi səfir Patrisiya Kortes ölkələrimiz arasında əməkdaşlıq əlaqələrinin müxtəlif sahələr üzrə gündən-günə daha da gücləndiyini vurğulayıb. O, ölkəmizin COP29 kimi mötəbər beynəlxalq tədbirə yüksək səviyyədə ev sahibliyi etdiyini bildirib, əlverişli geostrateji mövqeyə malik Azərbaycanın yürütdüyü uğurlu xarici siyasətin onu bütün dünya, eləcə də Latın Amerikası ölkələri üçün etibarlı tərəfdaşa çevirdiyini qeyd edib.
Kolumbiyalı diplomat iki ölkə arasında fəal siyasi dialoqun və təmasların ikitərəfli əməkdaşlığın genişləndirilməsinə əlavə imkanlar yaratdığını bildirib. Həmçinin 2024-cü ildə iqlim dəyişikliyinin təsirlərinin aradan qaldırılması məqsədilə Azərbaycan hökuməti tərəfindən ölkəsinə humanitar yardımların ayrılmasına görə bir daha minnətdarlıqlarını çatdırıb.
Sonda Azərbaycanın Müstəqillik Günü ilə əlaqədar, o cümlədən ölkəmizin turizm imkanlarını əks etdirən videoçarxlar nümayiş etdirilib.
Bölmənin digər xəbərləri
