Konqres liderləri Baydenlə görüşdə Ukraynaya yardımla bağlı razılığa gələ bilməyiblər
Bakı, 29 fevral, AZƏRTAC
Konqres liderləri Ağ evdə Prezident Cozef Baydenlə görüşdə mühafizəkar respublikaçıların xarici yardım və Meksika ilə sərhədin möhkəmləndirilməsi ilə bağlı dəyişməz mövqeyini təsdiqləyiblər.
AZƏRTAC xəbər verir ki, ABŞ Konqresinin Nümayəndələr Palatasının spikeri Mayk Conson bunu “The Hill” qəzetinə müsahibəsində deyib.
“Mən prezidentə və orada iştirak edən hər kəsə xatırlatdım ki, ABŞ-da bir nömrəli problem açıq sərhəddir. Qarşılaşdığımız fəlakət Prezident Cozef Baydenin planlaşdırdığı və yaratdığı vəziyyətdən qaynaqlanır. Biz daha gözləyə bilmirik”, - deyə Mayk Conson bildirib.
Nümayəndələr Palatasının spikerinin müsahibəsi konqres liderlərinin hökumətin fəaliyyətinin dayanmasının (şatdaun) qarşısını almaq üçün bir sıra sferalarda maliyyələşməni martın 8-nə qədər uzatmağa razılaşmasından bir neçə saat sonra dərc olunub.
Şatdaunun qarşısını almaq üçün əldə edilən razılaşmaya sərhəd məsələsi, həmçinin Ukrayna, İsrail və Tayvana maliyyə yardımı daxil edilməyib. Respublikaçılar hesab edirlər ki, xarici yardımların ayrılması məsələsinə yalnız ABŞ-ın cənub sərhədinin möhkəmləndirilməsi ilə yanaşı baxıla bilər.
Bölmənin digər xəbərləri
