Koreya Fəhlə Partiyasının qurultayı keçirilir
Pekin, 20 fevral, AZƏRTAC
Koreya Xalq Demokratik Respublikasının (KXDR) siyasi həyatında vacib tədbir – Koreya Fəhlə Partiyasının (KFP) 9-cu qurultayı keçirilir.
AZƏRTAC Koreya Mərkəzi Xəbər Agentliyinə (KCNA) istinadla xəbər verir ki, qurultayın açılışında KXDR lideri, Koreya Fəhlə Partiyasının baş katibi Kim Çen In məruzə ilə çıxış edib.
"Bu qurultay partiyanın mərkəzi komitəsinin 8-ci səlahiyyət müddəti ərzində görülən işləri lazımi şəkildə nəzərdən keçirəcək və təhlil edəcək, sosialist quruculuğumuzu daha yüksək səviyyədə inkişaf etdirmək üçün istiqamət və siyasət müəyyən edəcək, partiyanın liderlik qabiliyyətini tənzimləmək və gücləndirmək üçün təşkilati və institusional tədbirlər görəcək", - deyə Kim Çen In bildirib. O, ölkə iqtisadiyyatının çətinliklərin öhdəsindən gəldiyini və 2021-ci ildə keçirilən əvvəlki partiya qurultayından bəri irəliləyiş üçün təməl qoyduğunu bildirib.
Qurultayın gündəliyinə 3 məsələ - Mərkəzi Komitənin işinin yekunlaşdırılması, partiya nizamnaməsinin yenidən işlənməsi və mərkəzi idarəetmə orqanının seçilməsi daxil edilib.
Qeyd edək ki, 5 ildən bir keçirilən qurultay KXDR-in əsas siyasi tədbiridir. Adətən bir neçə gün davam edən qurultay iqtisadiyyat, müdafiə və diplomatiya üzrə növbəti 5 il üçün dövlət siyasətinin hədəflərini müəyyən edir və mühüm kadr qərarları verir. Qurultayda təxminən 5 min nümayəndə iştirak edir.
AZƏRTAC-ın xüsusi müxbiri
Pekin
Bölmənin digər xəbərləri
