Kreml Rusiya Prezidentinin Çinə qarşıdakı səfəri barədə məlumat verib
Moskva, 29 avqust, AZƏRTAC
Rusiya Prezidenti Vladimir Putin avqustun 31-dən sentyabrın 3-dək Çinə səfər edəcək. O, Tyançzində keçiriləcək Şanxay Əməkdaşlıq Təşkilatının sammitində, həmçinin Pekindəki İkinci dünya müharibəsinin başa çatmasının 80 illiyinə həsr olunmuş tədbirlərdə iştirak edəcək.
AZƏRTAC xəbər verir ki, bu barədə Rusiya Prezidentinin köməkçisi Yuri Uşakov məlumat verib. Onun sözlərinə görə, səfər çərçivəsində V. Putin Çin Xalq Respublikasının Sədri Si Cinpinlə danışıqlar aparacaq, həmçinin Hindistanın Baş naziri Narendra Modi, İran Prezidenti Məsud Pezeşkian, Serbiya Prezidenti Aleksandar Vuçiç, Türkiyə Prezidenti Rəcəb Tayyib Ərdoğan və Özbəkistan Prezidenti Şavkat Mirziyoyevlə görüşəcək. Bundan əlavə, Rusiya, Çin və Monqolustan liderlərinin üçtərəfli görüşü də planlaşdırılır.
Putinlə Si Cinpin arasında keçiriləcək danışıqlar geniş və məhdud tərkibdə aparılacaq. Görüşlərdə ABŞ-la münasibətlər və Ukrayna ətrafında yaranmış vəziyyət müzakirə olunacaq.
Rusiya nümayəndə heyətinin tərkibinə baş nazirin üç mavini, 10-dan çox nazir, həmçinin dövlət korporasiyalarının rəhbərləri və iri biznes nümayəndələri daxil olacaq.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
