SİYASƏT
KRIMDA AZƏRBAYCANIN MİLLİ BAYRAMI QEYD OLUNMUŞDUR
Bakı, 27 may (AZƏRTAC). Krım Sənaye Pedaqoji Universitetində Azərbaycanın milli bayramı – Respublika Günü münasibətilə tədbir keçirilmişdir.
Krım Azərbaycanlıları Cəmiyyətindən Azərbaycan Respublikasının Diasporla İş üzrə Dövlət Komitəsinə bildirmişlər ki, universitetin rektoru, Ukraynanın milli qəhrəmanı Fevzi Yakubov tədbiri açaraq bayram münasibətilə Azərbaycan xalqını təbrik etmişdir.
Azərbaycan haqqında film nümayiş etdirilmişdir.
Sonra universitetin professoru İsmayıl Kərimov Azərbaycan-Krım münasibətləri barədə məruzə ilə çıxış etmişdir.
Tədbirdə universitetin professor-müəllim heyəti, tələbələr, şəhər rəhbərliyinin və ictimaiyyətinin nümayəndələri, Krımda səfərdə olan Bakı Dövlət Universitetinin rektoru, Milli Məclisin deputatı Abel Məhərrəmov iştirak etmişlər.
Tədbir geniş konsert proqramı ilə başa çatmışdır.