Kür çayında suyun səviyyəsi artmışdır
Bakı, 18 yanvar (AZƏRTAC). Ekologiya və Təbii Sərvətlər Nazirliyi yanvarın 18-də çayların sululuğu ilə bağlı apardığı araşdırmanın nəticələrini açıqlamışdır.
Nazirliyin mətbuat xidmətindən AZƏRTAC-a bildirmişlər ki, araşdırmanın nəticələrinə görə, Böyük Qafqazın Quba-Xaçmaz bölgəsi çaylarında sululuq ongünlük normanın 80-200, Kiçik Qafqazın çaylarında 80-150, Lənkəran-Astara bölgəsi çaylarında 40-160, Naxçıvan Muxtar Respublikası çaylarında isə 50 faizini təşkil etmişdir.
Kür çayının Qıraqkəsəmən məntəqəsində suyun səviyyəsində 4 santimetr artım qeydə alınmışdır. Məntəqədə su sərfi saniyədə 130 kubmetr olmuşdur.
Son günlərdə ölkə ərazisində temperatur rejiminin nisbətən yüksəlməsi və alçaq dağlıq ərazilərdə qarın tədricən əriməsi ilə əlaqədar Kür çayının aşağı axınında da suyun səviyyəsində artım müşahidə olunmuşdur.
Hazırda Kür çayının Surra məntəqəsində suyun səviyyəsi 450, Şirvanda 327, Salyanda 270, Bankədə 243, Araz çayının Novruzlu məntəqəsində isə 195 santimetrdir.
Bütün məntəqələrdə suyun səviyyəsinin ötən ilin müvafiq dövrü ilə müqayisədə aşağı olduğu müəyyən edilmişdir.
Bölmənin digər xəbərləri
