“LƏNKƏRAN” QƏZETİNİN 75 İLLİYİ TƏNTƏNƏ İLƏ QEYD OLUNMUŞDUR
Tədbir iştirakçıları Lənkəran şəhərinin mərkəzi meydanında ümummilli liderimiz Heydər Əliyevin abidəsinin önünə gül-çiçək dəstələri düzmüş, böyük öndərin xatirəsini ehtiramla yad etmişlər.
Mərasimdə şəhər icra hakimiyyətinin başçısı Süleyman Mikayılov çıxış edərək “Lənkəran” qəzetinin 75 illiyi və milli mətbuatımızın 131–ci ildönümü münasibətilə jurnalistləri təbrik etmiş, yerli mətbu orqanın rayonun ictimai-siyasi və mədəni həyatında oynadığı rolu yüksək qiymətləndirmiş, Azərbaycan öz müstəqilliyinə yenidən qovuşduqdan sonra ölkəmizdə söz və mətbuat azadlığının bərqərar olunmasında ümummilli liderimiz Heydər Əliyevin xidmətlərini diqqətə çatdırmışdır.
Toplantıda Bakı Dövlət Universiteti jurnalistika fakültəsinin kafedra müdiri, dosent Cahangir Məmmədli “Heydər Əliyev və Azərbaycan mətbuatı” mövzusunda məruzə ilə çıxış etmişdir.
Müstəqil Azərbaycan dövlətinin memarı və qurucusu, ümummilli liderimiz Heydər Əliyevi yaradıcı ziyalıların və jurnalistlərin dostu adlandıran natiq, böyük öndərin söylədiyi “Bütün demokratik dəyərlərə gedən yol mətbuatdan keçir” fikrini xüsusi vurğulayaraq böyük rəhbərin 1998-ci ildə Azərbaycan mətbuatında senzuranın ləğvi haqqında imzaladığı Fərmanla milli mətbuatımızda yeni mərhələnin başlandığını bildirmiş, Heydər Əliyev siyasi kursunu uğurla davam etdirən Prezident İlham Əliyevin də mətbuat işçilərinə böyük hörmət və ehtiramla yanaşdığını diqqətə çatdırmışdır.
Yığıncaqda şəhər icra hakimiyyəti başçısının “Lənkəran” qəzetinin 75 illiyi münasibətilə yerli mətbuat orqanının əməkdaşlarına ünvanladığı təbrik məktubu oxunmuşdur.
“Lənkəran” qəzetinin baş redaktoru İltifat Əhmədov tədbirdə çıxış edərək 1931-ci ildə “Qızıl Talış” adı ilə nəşr olunan, sonralar “Sıə Tolış”, “Sosialist subtropikası”, “Leninçi” və “Lənkəran” adları ilə işıq üzü görən qəzetin rayonun ictimai-siyasi və mədəni həyatındakı tutduğu mövqedən danışmış, jurnalistləri peşə bayramları münasibətilə təbrik etmişdir.
Şəhər icra hakimiyyətinin başçısı Süleyman Mikayılov Azərbaycan Kütləvi İnformasiya Vasitələri İşçiləri Həmkarlar İttifaqı Rəyasət Heyətinin qərarı ilə mətbuatda səmərəli fəaliyyətinə görə “Lənkəran” qəzetinin baş redaktoru İltifat Əhmədova və qəzetin əməkdaşı Xudaverdi Cavadova “Qızıl qələm”, qəzetdə şöbə müdiri işləmiş Qüdrət Cəfərova isə “Ustad sənətkar” ali jurnalist mükafatlarını təqdim etmişdir.
Toplantıda, həmçinin “Lənkəran” qəzetinin bir qrup əməkdaşına və bölgə müxbirlərinə şəhər icra hakimiyyəti başçısının fəxri fərmanları və qiymətli hədiyyələri təqdim edilmişdir.
