LƏNKƏRANDA REGİONAL İCTİMAİ FƏAL MƏKTƏBLƏR ŞƏBƏKƏSİ YARADILMIŞDIR

17.01.2004 [15:25]
Çap et
A⁺ A^-

AZƏRTAC-ın müxbiri xəbər verir ki, Lənkəran rayonunda ictimai fəal məktəblər şəbəkəsinin yaradılmasına dair ilk layihə Azərbaycan Açıq Cəmiyyət İnstitutu - Yardım Fondunun maliyyə dəstəyi ilə 2003-cü ilin yanvarından həyata keçirilir. Həmin layihəyə əsasən, Lənkəran rayonunun təhsil müəssisələrində ictimai fəal məktəb və onun tətbiq edilməsi modeli mövzusunda maarifləndirmə işi aparılmış, bu model əsasında təhsil müəssisələrindən ibarət Lənkəran regional ictimai fəal məktəblər şəbəkəsi yaradılmışdır.

Lənkəran Dövlət Universitetinin Təhsil-Məlumat Mərkəzi isə hazırda ABŞ Beynəlxalq İnkişaf Agentliyinin maliyyə dəstəyi ilə Avrasiya Fondunun qrantı əsasında “Lənkəran regional ictimai fəal məktəblər şəbəkəsi” layihəsini - məktəblərdə yeni idarəetmə mexanizminin tətbiq edilməsi mərhələsini həyata keçirir.

Həmin layihələrə əsasən, Lənkəran şəhər 4,5,10 nömrəli, Aşağı Nüvədi qəsəbə orta və uşaq rəssamlıq məktəblərində İFM modeli tətbiq olunmağa başlanmışdır. Bu məktəblərdə interaktiv informasiya guşələri, planlaşdırma və qiymətləndirmə qrupları yaradılmış və fəaliyyətə başlamışdır.

Hazırda regional ictimai fəal məktəblər şəbəkəsi rayonun 13 təhsil müəssisəsini əhatə edir.