Litvada Xocalı soyqırımı qurbanlarının xatirəsi anılıb
Vilnüs, 25 fevral, AZƏRTAC
Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq məlumatlandırma kampaniyası çərçivəsində Azərbaycanın Litvadakı səfirliyi Avropa Azərbaycan Cəmiyyətinin (TEAS) dəstəyi ilə Vilnüs şəhər sarayında (Ratuşa) Xocalı soyqırımının 23-cü ildönümü ilə bağlı “Həyat üçün qan” adlı anma mərasimi keçirib.
Tədbirdə Litva Seymində Azərbaycanla parlamentlərarası əlaqələr qrupunun sədri Yuras Pojela, GUAM-a üzv ölkələrin ərazi bütövlüyü üzrə qrupun rəhbəri Mantas Adomenas və Seymin deputatları, Litva Olimpiya Komitəsinin prezidenti və bir sıra nazirliklərin vəzifəli şəxsləri, QHT rəhbərləri, ictimai-siyasi xadimlər, mədəniyyət xadimləri, media nümayəndələri, Litva Azərbaycanlı Gənclər Təşkilatının (AYOL) üzvləri, Litvada yaşayan soydaşlarımız və təhsil alan tələbələrimiz iştirak ediblər.
Səfir Həsən Məmmədzadə Xocalı soyqırımı haqqında qonaqlara ətraflı məlumat verərək, bu faciənin təkcə azərbaycanlılara deyil, bütün bəşəriyyətə qarşı törədilmiş ağır cinayət olduğunu bildirib. O, həmin gün yüzlərlə dinc azərbaycanlı əhalinin yalnız milli mənsubiyyətinə görə məhv edildiyini və bu dəhşətli faciənin Azərbaycan xalqının qan yaddaşında əbədi həkk olunduğunu qeyd edib. Diplomat Anma mərasimi çərçivəsində Xocalı qurbanlarının xatirəsinin yad edilməsi məqsədilə səfirlik tərəfindən qanvermə aksiyasının təşkil edildiyini iştirakçıların diqqətinə çatdıraraq, hamını bu aksiyaya qoşulmağa çağırıb.
Litva Seymində Azərbaycanla parlamentlərarası əlaqələr qrupunun sədri Yuras Pojela çıxışında Ermənistan-Azərbaycan, Dağlıq Qarabağ münaqişəsinin ağır nəticələri barədə danışaraq Azərbaycanın ərazisinin 20 faizinin işğal edildiyini, bir milyondan artıq insanın doğma yurdlarından didərgin düşdüyünü qeyd edib. Y.Pojela 23 üç il öncə dünya birliyinin gözü qarşısında erməni millətçiləri tərəfindən bəşəriyyətə qarşı cinayət törədildiyini bildirərək, beynəlxalq ictimaiyyət tərəfindən bu qətliama siyasi-hüquqi qiymətin verilməsinin və cinayətkarların cəzalandırılmasının vacibliyini vurğulayıb. O, bu günlərdə Xocalı soyqırımı ilə əlaqədar Litva Seyminin 51 üzvünün müraciət qəbul etdiyini qeyd edərək, Avropa İttifaqını Ukrayna məsələsində nümayiş etdirdiyi həssaslığı eyniliklə Dağlıq Qarabağ məsələsinin həllində də göstərməyə çağırıb.
Hərbi jurnalist Ricardas Lapaytis çıxış edərək 1992-1993-cü illərdə dəfələrlə Azərbaycana səfər etdiyini, ermənilər tərəfindən Laçında, Ağdamda və digər rayonlarda törədilmiş qanlı hadisələrin canlı şahidi olduğunu qeyd edib. O, Xocalı qətliamının acı nəticələrinin şəkillərini çəkdiyini söyləyib. O, Xocalı faciəsi haqqında Litvada yazan ilk jurnalistin olduğunu, “Sonsuz dəhliz” sənədli filminin çəkilişində iştirak etdiyini bildirib.
Daha sonra mərasimdə litvalı rejissor Aleksandras Brokas və Mindaugas Urbonaviçusun çəkdiyi “Sonsuz dəhliz” sənədli filmi nümayiş olunub.
Tədbirdə səfirliyin əməkdaşları, Litvada təhsil alan tələbələrimiz və daimi yaşayan soydaşlarımız Xocalı soyqırımının qurbanlarının xatirəsinə Litvada qan azlığından əziyyət çəkən insanlar üçün qan veriblər.
Səfir Həsən Məmmədzadə Xocalı soyqırımı ilə bağlı Litva televiziya kanallarına müsahibə verib.
Anım mərasimi haqqında məlumat Litvanın ən çox baxılan TV3, LRT, LNK, PenkiTv televiziya kanallarının xəbərlər verilişində nümayiş olunub, “extrafm” radiosunda yayımlanıb, “ELTA”, “lzinios”, “15min.lt”, “lrt.lt”, “sveikata.lrytas.lt”, “madeinvilnius.com” kimi nüfuzlu informasiya agentlikləri və internet portallarında mərasimlə bağlı məqalələr dərc olunub.
Nigar Cəfərli
AZƏRTAC-ın xüsusi müxbiri
Vilnüs
Bölmənin digər xəbərləri
