İDMAN
Luis Hamilton Formula 1 tarixinin ən bahalı kontraktını imzalaya bilər
Bakı, 5 aprel, AZƏRTAC
“Mersedes” komandasını təmsil edən Luis Hamiltonun 2019-2021-ci illər üçün imzalayacağı yeni kontrakt Formula 1 tarixində ən bahalı anlaşma ola bilər.
AZƏRTAC “F1News.ru” saytına istinadla xəbər verir ki, qeyri-rəsmi məlumatlara görə, söhbət üç il müddətinə 184 milyon dollar, hər mövsümdə 60 milyon dollardan gedir. “Ferrari” komandasından Mixael Şumaxerin qazancı sponsorlardan gələn məbləğ istisna olmaqla 50 milyon dollara çatırdı. Yaxın həftələrdə “Mersedes”də bütün şərtlərin razılaşdırılacağı planlaşdırılır.
“Mersedes” komandasının rəhbəri Toto Volff deyib: “Kontrakt detallı razılaşma tələb edən yüz səhifədən artıq mətndən ibarətdir. Biz də hazırda bunun üzərində işləyirik”.