DÜNYA
Macarıstan Rusiyanın nüvə energetikasına münasibətdə mümkün sanksiyaları dəstəkləmir
![Macarıstan Rusiyanın nüvə energetikasına münasibətdə mümkün sanksiyaları dəstəkləmir](/files/2023/3/1200x630/17000496755822451562_1200x630.jpg)
Budapeşt, 15 noyabr, AZƏRTAC
Macarıstanın xarici işlər və xarici iqtisadi əlaqələr naziri Peter Siyarto feysbuk sosial şəbəkəsindəki hesabında yerləşdirdiyi paylaşımda Rusiyanın nüvə energetikasına münasibətdə Avropa İttifaqının sanksiyalarına qarşı öz fikrini bildirib.
AZƏRTAC xəbər verir ki, onun sözlərinə görə, Budapeşt bu cür sanksiyaları heç vaxt dəstəkləməyəcək. “Biz nüvə energetikası əleyhinə sanksiyaları heç vaxt dəstəkləməyəcəyik. Avropa İttifaqının 12-ci paketində nüvə sahəsinə qarşı hansısa məhdudiyyətlər olmamalıdır”, - deyə o bildirib.
Bununla belə hazırda məlumdur ki, Avropa İttifaqının 12-ci paket layihəsində Rusiyanın nüvə energetikasına münasibətdə sanksiyalar hələ yoxdur. Lakin paketin hələ təsdiqlənməməsi nəzərə alınarsa, onlar haqqında söz-söhbət getdikcə artır. Görünür, Budapeşt bu fonda qabaqcadan xəbərdarlıq etməyi qərara alıb ki, Macarıstan belə sanksiyaların sənəddə yer alacağı təqdirdə onları heç vaxt dəstəkləməyəcək.
Xatırladaq ki, daha əvvəl Budapeşt Avropa İttifaqı tərəfindən Ukraynaya silah-sursat üçün vəsaitin ayrılmasına etirazını bildirib. O, Macarıstan müəssisəsinin müharibənin beynəlxalq sponsorları siyahısına daxil olması ilə bağlı vəziyyətin heç vaxt təkrarlanmayacağına zəmanət tələb edib.
Vüqar Seyidov
AZƏRTAC-ın xüsusi müxbiri
Budapeşt