“MARKETİNQ” JURNALININ İKİNCİ NÖMRƏSİ ÇAPDAN ÇIXMIŞDIR
Ölkədə fəaliyyət göstərən yerli və xarici iş adamları, dövlət və özəl bölmədə çalışanlar üçün nəzərdə tutulan jurnalın bu sayında Azərbaycan və dünyanın biznes təcrübələrini əks etdirən jurnalist araşdırmaları, maarifləndirici materiallara geniş yer verilmişdir. Belə ki, iqtisadiyyatımızın aktual məsələləri tanınmış mütəxəssislər tərəfindən təhlil edilir, yerli və xarici müəlliflər marketinq, menecment, sahibkarlıq, reklam, ictimaiyyətlə əlaqələr sahəsində təcrübələrini oxucularla bölüşürlər.
Bundan əlavə, jurnalda turizm sektorunda tanınmaq üçün “qızıl məsləhətlər” açıqlanmışdır. ABŞ-ın məşhur marketinq mütəxəssisi Heri Armstronqla müsahibə, dünyada tanınan Gitomerin satış fəndləri, ölkəmizin iş adamları ilə müsahibələr də oxucuların marağına səbəb olacaqdır. Onlar Azərbaycanın daşınmaz əmlak, tikinti materialları, kənd təsərrüfatı məhsulları, ərzaq məhsulları bazarında son qiymətlər, qiymətli kağızlar bazarında yeniliklər, müxtəlif növ məhsullar axtaran xarici şirkətlərin siyahısı, beynəlxalq sərgilər, maliyyə bölməsindən xəbərlərlə də tanış ola biləcəklər.
Jurnalda yalnız xarici iş adamları üçün nəzərdə tutulmuş “English Section” bölməsi də verilmişdir. Burada ingiliscə materiallar dərc olunmuşdur.
“Marketinq” jurnalı ayda bir dəfə 3 min tirajla, Azərbaycan dilində, nəfis tərtibatda çap olunur.
