“Mavi dəbilqəlilər” himayəsiz qalmış şimpanzeni xilas ediblər
Bakı, 18 mart, AZƏRTAC
Konqo Demokratik Respublikasının (KDR) şimalında yerləşən hərbi bazanın ərazisində himayəsiz qalmış şimpanze balası aşkar olunub. Bu barədə Konqonun vəhşi heyvanların mühafizəsinə cavabdeh olan məmurları məlumatlandırılıb. Şimpanzenin köməyinə BMT sülhməramlıları gəliblər. Onlar bala şimpanzeni Cənubi Kivu əyalətində primatlar üçün reabilitasiya mərkəzinə gətiriblər.
AZƏRTAC BMT-nin Xəbərlər Mərkəzinə istinadla xəbər verir ki, bazası BMT-nin Keniyadakı qərargahının ərazisində yerləşən təşkilatın - Primatların nəslinin artırılmasının təmin olunması layihəsini icra edən Tərəfdaşlığın nümayəndələri BMT sülhməramlılarına təşəkkür ediblər.
Tərəfdaşlıq nümayəndələri ilk dəfə deyildir ki, sülhməramlılarla birlikdə şimpanze və qorillaları xilas edirlər. Bu sahədə əməkdaşlıq 2011-ci ildən davam edir. Kimiya adlandırılan üç yaşlı şimpanze heyvan yetişdirmə müəssisəsinin ərazisində öz həmcinsləri arasında yaşayacaq.
Primatların nəslinin artırılmasının təmin olunması layihəsini icra edən Tərəfdaşlıq 102 üzvü olan unikal alyansdır. Alyansın üzvləri arasında dövlətlər, BMT müəssisələri, təbiəti mühafizə edən təşkilatlar və özəl şirkətlər var. Alyansın vəzifəsi meymunları, habelə Afrika və Asiyada onların məskunlaşdıqları yerləri mühafizə etməkdir.
Bölmənin digər xəbərləri
