MDU-da 20 Yanvar faciəsinin ildönümü ilə əlaqədar elmi konfrans keçirilib
Bakı, 20 yanvar, AZƏRTAC
Mingəçevir Dövlət Universitetində (MDU) Ümumxalq Hüzn Gününə həsr olunmuş “20 Yanvar: Azərbaycan tarixinin şərəf və qəhrəmanlıq səhifəsi” mövzusunda elmi konfrans keçirilib.
Bu barədə AZƏRTAC-a MDU-dan məlumat verilib.
Əvvəlcə 20 Yanvar faciəsinin qurbanları və torpaqlarımızın ərazi bütövlüyü uğrunda canından keçmiş şəhidlərin əziz xatirəsi bir dəqiqəlik sükutla yad edilib.
Konfransda çıxış edən Mingəçevir Dövlət Universitetinin rektoru Şahin Bayramov 34 il öncə baş verən qanlı faciənin mahiyyəti, onu doğuran səbəblər, həmin vaxt ölkədə yaşanan xaos, xalqın apardığı azadlıq mübarizəsi, Qarabağ Zəfəri barədə iştirakçıları məlumatlandırıb. 1990-cı il yanvarın 19-dan 20-nə keçən gecə paytaxt Bakıda baş verən qanlı qətliamı, onun dəhşətli nəticələrini, yüzlərlə günahsız insanın gülləbaran edildiyini diqqətə çatdıran rektor 20 Yanvar faciəsini 2020-ci ildə əldə olunan Zəfər yolunun başlanğıcı kimi qiymətləndirib.
Sonra 20 Yanvar faciəsinə həsr olunmuş videoçarx nümayiş etdirilib və proqrama uyğun olaraq məruzələr dinlənilib.
MDU müəllimlərindən Leyla Babayeva "20 Yanvar faciəsi: Səbəb, nəticə və tarixi dərs", Hüseyn Əsgərov "20 Yanvar faciəsinin hüquqi-siyasi aspektləri", Jalə Qasımova "20 Yanvar faciəsi beynəlxalq mətbuatda", Ceyran Vəliyeva "Qanlı 20 Yanvar bədii ədəbiyyatımızda" və Tələbə Vətənpərvərlik İnkişafı Mərkəzinin koordinatoru Minayə Hüseynova "20 Yanvar hadisələri və Azərbaycan gəncliyi" mövzularında məruzə ilə çıxış ediblər.
Çıxışlarda Azərbaycan xalqına qarşı törədilən bu cinayətin əsl mahiyyəti barədə məlumat verilib, 20 Yanvar hadisələri Azərbaycan tarixinin qəhrəmanlıq səhifəsi kimi səciyyələndirilib. Xalqımızın Ümummilli Lideri Heydər Əliyevin bu qanlı faciəni törədənləri dərhal kəskin ittiham etdiyi və xalqımızın ən çətin günündə ona mənəvi dəstək olduğu vurğulanıb. Prezident İlham Əliyevin rəhbərliyi altında müstəqil Azərbaycanın qət etdiyi inkişaf yolundan bəhs olunub, ölkəmizin əldə etdiyi nailiyyətlərdən söz açılıb.
Bölmənin digər xəbərləri
