Media: ABŞ mühacirlərlə mübarizəyə Milli Qvardiyanı cəlb etmək istəyir
Bakı, 16 may, AZƏRTAC
ABŞ Daxili Təhlükəsizlik Nazirliyi Milli Qvardiyanın 20 min əsgərini qeyri-qanuni mühacirlərlə mübarizəyə və deportasiyaların təşkilinə cəlb etmək niyyətindədir.
AZƏRTAC xəbər verir ki, “The Hill” qəzetinin məlumatına görə, milli təhlükəsizlik nazirinin köməkçisi Trişa Maklaflin artıq Pentaqona və Milli Qvardiya rəhbərliyinə müvafiq sorğunun göndərildiyini deyib. Onun sözlərinə görə, hərbçilər qanunsuz mühacirlərin həbsi və ölkədən çıxarılması ilə bağlı prezidentin tapşırığını yerinə yetirməlidir.
Pentaqon Daxili Təhlükəsizlik Nazirliyindən müvafiq sorğu alındığını təsdiqləsə də, onun məzmununu açıqlamayıb.
Nəşr qeyd edir ki, əvvəllər qeyri-qanuni mühacirlərə qarşı mübarizədə federal səviyyədə iştirak etməyən Milli Qvardiya Texas kimi bəzi ştatlarda köməkçi güc qismində cəlb olunub.
Xatırladaq ki, Donald Tramp ikinci dəfə hakimiyyətə gəldikdən sonra federal hakimiyyət qeyri-qanuni mühacirlərə qarşı kütləvi reydlər keçirməyə başlayıb. Vaşinqton hər gün immiqrasiya qanununu pozan azı 1800 şəxsi saxlamağı qarşısına məqsəd qoyub. Bu tədbirlər yerli hakimiyyət orqanlarının müqaviməti və vəsait çatışmazlığı ilə müşayiət olunur. Bəzi ştatların məhkəmələri prosesi dayandırmağa çalışır.
Bölmənin digər xəbərləri
