Media: İranın Körfəz ölkələrinə hücumları davam edir
Bakı, 11 mart, AZƏRTAC
Ərəb mediası xəbər verir ki, martın 11-də İranın Körfəz ölkələrinə hücumları davam edib.
AZƏRTAC xəbər verir ki, Bəhreyn Müdafiə Qüvvələrinin Baş Komandanlığı İranın hücumlarının başlanğıcından bəri Krallığı hədəf alan 106 ballistik raket və 177 pilotsuz uçuş aparatının (PUA) hava hücumundan müdafiə sistemləri tərəfindən ələ keçirildiyini və məhv edildiyini açıqlayıb.
Bəhreyn Xəbər Agentliyi (BNA) Baş Komandanlığın bəyanatını yayıb: “Ballistik raketlər və pilotsuz uçuş aparatları ilə mülki obyektlərin və şəxsi mülklərin hədəfə alınması beynəlxalq humanitar hüququn və Birləşmiş Millətlər Təşkilatının Nizamnaməsinin açıq şəkildə pozulmasıdır. Bu ayrı-seçkilik etməyən hücumlar regional sülh və təhlükəsizliyə birbaşa təhdiddir”.
Qətər Xəbər Agentliyinin (QNA) xəbərinə görə, Qətər Müdafiə Nazirliyi çərşənbə günü Qətər Silahlı Qüvvələrinin ölkəni hədəf alan raket hücumunu dəf etdiyini açıqlayıb. Qeyd olunub ki, İranın beş ballistik raketi və çoxlu sayda dronu məhv edilib.
Oman Xəbər Agentliyinin (ONA) verdiyi məlumata görə, Oman Sultanlığındakı bir təhlükəsizlik mənbəyi bir pilotsuz uçuş aparatının vurulduğunu və digərinin isə Duqmın şimalındakı dənizə düşdüyünü, insan tələfatı və ya maddi ziyan qeydə alınmadığını açıqlayıb.
Oman Sultanlığı ölkənin sakinlərinin təhlükəsizliyini qorumaq üçün bütün lazımi tədbirləri gördüyünü vurğulayıb, davam edən hədəf əməliyyatlarını pislədiyini və qınadığını təsdiqləyib.
Səudiyyə Ərəbistanı Müdafiə Nazirliyi isə dörd dronun tutulduğunu və məhv edildiyini açıqlayıb. Krallığın Mətbuat Agentliyi (SPA) Müdafiə Nazirliyinin sözçüsü general-mayor Turki əl-Malikiyə istinadla bildirib ki, Şərq bölgəsində İranın dörd dronu məhv edilib.
BƏƏ-nin rəsmi WAM agentliyinin verdiyi xəbərə görə, Əl-Əzhərin böyük imamı Əhməd Əl-Tayibin sədrliyi ilə Müsəlman Ağsaqqallar Şurası Birləşmiş Ərəb Əmirliklərinin İraqın Kürdüstan bölgəsindəki baş konsulluğunu hədəf alan və heç bir xəsarət almadan maddi ziyana səbəb olan terrorçu dron hücumunu ən sərt şəkildə pisləyib.
Şura diplomatik nümayəndəliklərə və binalara edilən bu cür qorxaq hücumları birmənalı şəkildə rədd etdiyini təsdiqləyərək vurğulayıb ki, onlar beynəlxalq norma və qanunların kobud şəkildə pozulmasıdır, həmçinin regionun təhlükəsizliyini və sabitliyini təhdid edən təhlükəli eskalasiya əlamətidir.
Müsəlman Ağsaqqallar Şurası Birləşmiş Ərəb Əmirlikləri və bir sıra ərəb ölkələrini hədəf alan açıq hücumları qəti şəkildə pislədiyini bir daha bildirib və beynəlxalq ictimaiyyəti məsuliyyəti öz üzərinə götürməyə, müharibəyə son qoymaq üçün çalışmağa, regionu və dünyanı daha genişmiqyaslı münaqişədən xilas etməyə çağırıb.
Agentlik, həmçinin martın 11-də Dubay və Əbu-Dabidə çoxlu sayda dron və raketlərin məhv edildiyini bildirib.
Bölmənin digər xəbərləri
