Mələk Səmədli: Azərbaycan dilini həyatla əlaqələndirərək tədris etməyə çalışıram VİDEO
Bakı, 7 sentyabr, AZƏRTAC
Texnologiyanın inkişafı şagirdlər üçün dərsi və məlumat əldə etmə prosesini daha maraqlı edir. Çünki onlar məlumatı sadəcə kitabdan deyil, eyni zamanda, vizual şəkildə, müəllimin yönləndirməsi ilə, həm də özləri araşdıraraq müxtəlif vasitələrdən əldə edirlər. Məsələn, yutub, süni intellekt, müxtəlif axtarış saytları və digər resurslardan istifadə edirlər. Bu da dərsin onlar üçün daha yaddaqalan olmasına kömək edir.
Bu fikirləri AZƏRTAC-a müsahibəsində 161 nömrəli tam orta məktəbin Azərbaycan dili müəllimi Mələk Səmədli söyləyib. O bildirib ki, texnologiyadan düzgün və məqsədyönlü istifadə şagirdlərin dərsə marağını artırmaqla yanaşı, onların müstəqil araşdırma bacarıqlarının inkişafına da şərait yaradır.
Müsahibimiz qeyd edib ki, müəllim üçün əsas məsələlərdən biri şagirdin dərsdə özünü sərbəst hiss etməsi və fikrini çəkinmədən ifadə edə bilməsidir: “Çalışıram ki, şagirdlər dərsdə özlərini sərbəst hiss etsinlər, öz fikirlərini rahat şəkildə ifadə etməkdən çəkinməsinlər. Onsuz da yanlışlarını düzəltmək, onlara istiqamət vermək üçün müəllim var. Şagirdlər üçün müxtəlif yarışlar, debatlar və müzakirələr təşkil edirəm. Fikrimcə, nəinki şagird, ümumiyyətlə, insan harada öz fikrini rahat ifadə edə bilirsə, həmin mühit onun üçün daha maraqlı olur” – deyə müəllim bildirib.
Mələk Səmədli süni intellektin əmək bazarına təsiri barədə də fikirlərini bölüşüb: “Mənə elə gəlir ki, peşələr tamamilə yox olmayacaq, sadəcə müəyyən peşələrin formatı dəyişəcək. Ümumiyyətlə, hər bir işdə gündəlik təkrarlanan fəaliyyətlər olur. İşin həmin hissəsini süni intellekt gördükdə bu, insan əməyini xeyli asanlaşdırır. Amma düşünürəm ki, süni intellekt nə qədər inkişaf etsə də, insan zəkasına, insanın öz hissiyyatını və yaradıcılığını işinə qatmasına hər zaman ehtiyac olacaq”.
Valideynlərin övladlarının peşə seçimində roluna da toxunan müəllim qeyd edib ki, bəzən uşaqların marağı, istedadını və düşüncəsi nəzərə alınmır: “Halbuki bu, çox önəmli məsələdir. Peşə seçimi insanın öz iradəsi və istəyi ilə, təbii ki, həm maraq dairəsinə, həm də bacarığına uyğun şəkildə həyata keçirilməlidir. Bu, insanın həyatında ən böyük qərarlardan biridir”.
Müəllim Azərbaycan dilinin tədrisində ənənəvi yanaşma ilə yanaşı, şagirdlərin gündəlik həyatı, maraq dairəsi və yaş xüsusiyyətlərinin nəzərə alınmasının vacibliyini vurğulayıb: “Azərbaycan dilini təkcə qaydalar toplusu kimi öyrənilən bir fənn deyil, həyatla əlaqələndirilərək tədris olunan bir fənn kimi təqdim etməyə çalışıram. Şagirdlərin yaş kateqoriyasına uyğun nümunələr gətirir, onların fikirlərini və maraq dairəsini nəzərə alaraq dərsimi differensial formada qururam. Məqsədim odur ki, şagird öz fikrini rahat ifadə edə bilsin və dərs onun üçün maraqlı olsun.
Hazırda hər yerdə informasiya bolluğudur. Amma bununla yanaşı, dinləyib-anlama, oxuyub-anlama və fikrini sərbəst ifadə etmə bacarıqları ilə bağlı müəyyən problemlər və boşluqlar var. Bu, təkcə şagirdlərə deyil, ümumiyyətlə, müxtəlif yaş qruplarından olan insanlara da aiddir. Azərbaycan dili müəllimi olaraq əsas vəzifələrimizdən biri şagirdlərimizin bu boşluqlarını aradan qaldırmaqdır. İstəyirik ki, insan düşündüyü fikri rahat, sərbəst və təbii şəkildə ifadə etməyi, eyni zamanda oxuduğu və dinlədiyi fikri düzgün anlamağı bacarsın”.
Bölmənin digər xəbərləri
