MƏRDƏKANDAKI PİR HƏSƏN ZİYARƏTGAHI YENİ GÖRKƏM ALMIŞDIR
Dekabrın 30-da Prezident İlham Əliyev və xanımı Bakının Mərdəkan qəsəbəsindəki Pir Həsən ziyarətgahında olmuşlar.
Ziyarətgah XVI əsrə aiddir. Burada Pir Həsənin və yeddinci imam Museyi Kazımın qızı Xədicə xanımın qəbirlərinin olduğu bildirilir. Axund hacı Mirzə Əbu Turab Axundzadənin türbəsi, Hacı Zeynalabdin Tağıyevin və qızı Sara xanımın məzarları da buradadır. Bu ziyarətgah el arasında qorxu və nəzər piri kimi də tanınır.
Ziyarətgaha toplaşmış sakinlər, din xadimləri Prezidenti və xanımını böyük hörmət və ehtiramla qarşıladılar.
Prezident İLHAM ƏLİYEV onlarla hal-əhval tutaraq dedi:
- Sizi bayramlar münasibətilə təbrik edirəm. Bura da çox gözəlləşib, abadlaşıbdır. Abadlıq işləri yüksək zövqlə aparılıbdır. Əlbəttə, bu işləri görmək bizim borcumuzdur. İndi Təzəpir məscidində böyük tikinti işləri gedir. Həm Qafqaz Müsəlmanları Ruhani İdarəsinin yeni inzibati binası tikilir, həm də məscidin özü təmir olunur. Bibiheybət məscidində, Əjdərbəy məscidində də yenidənqurma, təmir işləri gedir. İndi bizim imkanmız var, gərək bunu edək.
2000-ci ildə buraya birinci dəfə gəlmişdim. O vaxt burada bəzi işləri gördük. Amma sonra baxdıq ki, daha böyük işlər görülməlidir. İndi ziyarətgah görkəmini tam dəyişibdir. İnsanların rahatlığı üçün hər yer gözəl, yüksək səviyyədə olmalıdır. Eyni zamanda, gərək xarici görkəm də gözəl, həm bizim milli ənənələrə uyğun şəkildə, həm də müasir tələblərə cavab verən səviyyədə olsun.
Ziyarətgahın rəhbəri kərbalayı LƏTİF dövlətimizin başçısına müraciətlə dedi:
- Cənab Prezident, xoş gəlmisiniz. Allah Sizə cansağlığı versin, ömrünüzü uzun etsin. Ulu öndərimiz demişdir ki, ziyarətgahlarımızın, məscidlərimizin hamısını abadlaşdırmaq lazımdır. O yükü Siz üzərinizə götürdünüz. Ulu Tanrı Sizin köməyiniz olsun. Biz Sizinlə fəxr edirik. Allaha şükür edirik ki, bizim belə Prezidentimiz var. İndi bura Ciddə şəhərinə oxşayır. Bu, insanların qəlbində, bəlkə də, min illərlə yaddaqalan xeyirxah işdir. Bu da Sizin adınızla bağlıdır ki, hörmətli Prezidentimiz 2006-cı ildə buranı ziyarət etmiş, bu dini ocağı orta və yeni nəslə bəxş etdi.
Cənab Prezident, ulu öndərimiz bir söz də demişdir: “Keçmişi qoru, gələcəyi qur”. Siz əməli işinizlə keçmişi qorudunuz, gələcəyi də YUNESKO-nun xoşməramlı səfiri Mehriban xanım Əliyeva burada qurdu. Allah sizlərə cansağlığı versin.
X X X
Sonra Prezident İlham Əliyev yeddinci imam Museyi Kazımın qızı Xədicə xanımın qəbrinə, axund Turabın türbəsinə, Hacı Zeynalabdin Tağıyevin büstünə, onun və qızı Sara xanımın məzarlarına baş çəkdi, qurbangaha və dəstənamazxanalara baxdı. Dövlətimizin başçısına məlumat verildi ki, axund hacı Mirzə Əbu Turab Axundzadə 1815-ci ildə Bakının Əmircan kəndində anadan olmuşdur. O, 1880-ci ildə vəfat etmiş və burada dəfn olunmuşdur. Öz dövrünün mütərəqqi və maarifpərvər şəxsiyyətlərindən sayılan Mirzə Əbu Turab fəlsəfəyə və din tarixinə dair bir çox kitabların müəllifi kimi, ilahiyyat elminin görkəmli nümayəndələrindən sayılırdı. Onun təşəbbüsü və xeyir-duası ilə Bakı şəhərində və onun ətrafında bir çox maarif ocaqları açılmış, doğma Əmircan kəndində açdığı ilk rus-tatar məktəbində isə axundun özü müxtəlif elmləri tədris etmişdir. Əbu Turab Axundzadənin qəbrinin üstündəki türbəni onun xatirəsinə hörmət və ehtiram əlaməti olaraq Bakı milyonçusu, xeyriyyəçi Murtuza Muxtarov tikdirmişdir. 1924-cü ildə vəfat etmiş məşhur xeyriyyəçi Hacı Zeynalabdin Tağıyev öz vəsiyyətinə əsasən axund Mirzə Əbu Turabın qəbrinin ayaq tərəfində dəfn olunmuşdur. Yeddinci imam Museyi Kazımın digər qızları - Rəhimə xanım Nardaran pirində, Leyla xanım Bilgəh kəndində, Hökumə xanım isə Bibiheybət məscidində dəfn edilmişlər. Bütün bunlar Azərbaycan torpağının müqəddəsliyini və tarixini göstərir.
Xüsusi vurğulandı ki, memarlıq abidəsi olan və dövlət tərəfindən mühafizə edilən türbədə və ətraf ərazidə 2000-ci ildə Azərbaycan Dövlət Neft Şirkətinin birinci vitse-prezidenti, Milli Məclisin deputatı İlham Əliyevin təşəbbüsü ilə abadlıq, bərpa işləri görülmüşdür.
Dövlətimizin başçısı ziyarətgaha gələn kişi və qadınların ayrıca namaz qılmaları, dua etmələri üçün tikilən məscidi ziyarət etdi, bunun əsl Şərq üslubunda inşa edildiyini bildirdi və xatirə kitabına ürək sözlərini yazdı:
“Pir Həsən ziyarətgahının Azərbaycan tarixində çox böyük yeri vardır. Burada aparılan təmir-bərpa işləri, məscidin tikilməsi, abadlıq işlərinin aparılması bütün İslam dininə sadiqliyimizi və böyük hörmətimizi bir daha göstərir.
Azərbaycanın dövlət müstəqilliyinin bərpasından sonra, əvvəllər ailələrdə qeyd olunan bayramlar dövlət bayramları kimi qeyd edilir. Biz öz milli dəyərlərimizi, ənənələrimizi, bayramlarımızı hər şeydən uca tutmalıyıq.
Bütün Azərbaycan xalqını müqəddəs Qurban bayramı münasibətilə təbrik edirəm.
İlham Əliyev
Azərbaycan Respublikasının Prezidenti
30.12.2006-cı il”.
X X X
Kərbalayı Lətif Prezident İlham Əliyevə yadigar olaraq Qurani-Kərim və təsbeh hədiyyə etdi, onunla xatirə şəkli çəkdirdi.
Azərbaycan Prezidenti sonra Pir Həsənin qəbrini dolanaraq Qurani-Kərimin altından keçdi, ölkəmizin firavan və xoşbəxt gələcəyi naminə xanımı ilə birlikdə qutuya nəzir saldı, ziyarətgahın ərazisini gəzdi.
Bölmənin digər xəbərləri
