MƏRKƏZİ KLİNİK XƏSTƏXANANIN KOLLEKTİVİ GÖRÜLƏN TƏDBİRLƏRİ DƏSTƏKLƏYİR

27.10.2005 [13:02]
Çap et
A⁺ A^-

Səhiyyə Nazirliyinin mətbuat xidmətindən AZƏRTAC-a bildirmişlər ki, Mərkəzi klinik xəstəxananın kollektivi son günlər ölkəmizdə baş verən ictimai-siyasi hadisələrlə, dövlətimizin başçısının həyata keçirdiyi mühüm tədbirlərlə bağlı yığıncaq keçirmişdir. Xəstəxananın baş həkimi Ceyhun Topçubaşov çıxış edərək məlum hadisələrə münasibət bildirmiş, səhiyyə sahəsində aparılan kadr dəyişikliyini yüksək qiymətləndirmiş, əhaliyə göstərilən tibbi xidmətin keyfiyyətini yüksəltmək sahəsində qarşıya qoyulan vəzifələrdən danışmışdır. Yığıncaqda çıxış edən kollektivin digər üzvləri də Azərbaycan Prezidentinin dövlətçiliyimizin möhkəmləndirilməsi, əhalinin rifahının yaxşılaşdırılması sahəsində atdığı qətiyyətli addımları ürəkdən bəyəndiklərini bildirmişlər. Tədbirin iştirakçıları bəyanat qəbul etmişlər. Bəyanatda deyilir:

“Son vaxtlar ölkəmizin ictimai-siyasi həyatında baş verən mənfi hadisələr, o cümlədən səhiyyə sistemində aşkara çıxarılan ciddi nöqsanlar Mərkəzi klinik xəstəxananın kollektivini də son dərəcə hiddətləndirmişdir. Biz ümummilli liderimiz Heydər Əliyev siyasətinin layiqli davamçısı, möhtərəm Prezidentimiz İlham Əliyevin dövlətçiliyimizin qorunması sahəsində atdığı qətiyyətli addımları yekdilliklə dəstəkləyir və təqdir edirik.

Kollektivimiz əmindir ki, dövlətimizin başçısı İlham Əliyevin yüksək şəxsi keyfiyyətlərinə, intellektinə, tükənməz işgüzarlıq və təşkilatçılıq qabiliyyətinə söykənən fəaliyyəti Azərbaycan xalqına bundan sonra da yalnız uğurlar gətirəcəkdir. Xəstəxanamızın kollektivi Prezidentimizin bu yöndəki fəaliyyətini hər zaman dəstəkləyəcəkdir”.

MƏRKƏZİ KLİNİK XƏSTƏXANANIN KOLLEKTİVİ GÖRÜLƏN TƏDBİRLƏRİ DƏSTƏKLƏYİR

MÜƏLLİFLƏ ƏLAQƏ

Bölmənin digər xəbərləri