SİYASƏT
Məşhur azərbaycanlının şərəfinə Nijnevartovskdakı küçələrdən birinə onun adı verilib
Moskva, 27 fevral, AZƏRTAC
Məşhur azərbaycanlı geoloq-neftçi, Sibir neftini kəşf etmiş geologiya-mineralogiya elmləri doktoru, Rusiya Elmlər Akademiyasının müxbir üzvü, Sosialist Əməyi Qəhrəmanı, Rusiya Federasiyasının əməkdar geoloqu Fərman Salmanovun şərəfinə Nijnevartovskdakı küçələrdən birinə onun adı verilib.
Nijnevartovsk şəhər administrasiyasının mətbuat xidmətindən verilən məlumata görə, bu haqda qərar şəhər toponimika şurasının iclasında qəbul edilib. Həmin küçəyə Yuqorsk neft yatağını kəşf etmiş şəxsin adının verilməsi təklifini Nijnevartovsk ictimaiyyətçiləri irəli sürüblər. Təqribən 600 nəfərin iştirak etdiyi onlayn səsvermə zamanı bu variant ən çox səs toplayıb.
Fərman Salmanov 1931-ci il iyulun 28-də Azərbaycanın Şəmkir rayonunda anadan olub. Geologiya sahəsində görkəmli mütəxəssis, dünya şöhrətli alim və təcrübəli geoloq Fərman Salmanov 30 ildən çox Qərbi Sibirdə işləyib. 1970-1980-ci illərdə Fərman Salmanovun rəhbərliyi ilə aparılmış geoloji-kəşfiyyat işləri nəticəsində 150-dən çox neft və qaz yatağı kəşf edilib.
Fəridə Abdullayeva
AZƏRTAC-ın xüsusi müxbiri
Moskva