Məşhur Hollivud aktyoru Aya səyahət şousunu təqdim edib
Bakı, 8 dekabr, AZƏRTAC
Məşhur Hollivud aktyoru Tom Henksin Aya insan səyahəti hekayəsi Londonda yeni immersiv şouda quraşdırılmış nəhəng divarlar arasından şüalanan kosmik raketlərin arxiv görüntüləri fonunda təqdim edilib.
AZƏRTAC “Tne Independent” nəşrinə istinadla xəbər verir ki, "Ayda gəzənlər: Tom Henkslə səyahət" şousu 1969-1972-ci illərdə “Apollon” missiyalarının Aya ilk enişlərinə və onların davamçısı, NASA-nın yeni “Artemis” proqramına həsr olunub.
Növbəti missiya - “Artemis II” çərçivəsində Aya uçuş gələn il üçün planlaşdırılır və dörd nəfərdən ibarət komanda ilə müsahibələr də Londonun King Cross ərazisindəki “Lightroom” qalereya məkanının divarlarında əks olunub.
Oskar mükafatı laureatı Henks astronavtlar Viktor Qlover və Ceremi Hansenlə birlikdə Reuters agentliyinə müsahibəsində deyib: "Bu şou Ayın möcüzəsi və insanlara onun üzərində yeriməyə imkan verən heyrətamiz səyahətlər haqqındadır. Əlli ildən çox müddətdən sonra gələn il Ayın ətrafında ilk ekipaj səyahəti olacaq”.
“Artemis II” Ay missiyasına ilk qaradərili astronavt olacaq pilot Viktor Qlover, missiya mütəxəssisləri Ceremi Hansen və Christina Koch, ekipaj komandiri Reid Vayseman daxildırlər. Bu proqram Yerin təbii peykində uzunmüddətli missiyanın həyata keçirilməsini nəzərdə tutur.
Tom Henks 1995-ci ildə oksigen anbarının partlaması nəticəsində Aya planlaşdırılan enişi dayandırmaq məcburiyyətində qalan problemli kosmik missiya haqqında lentə alınmış "Apollon 13" filmində ekipaj komandiri Cim Lovellin obrazını canlandırıb. Özünün kosmosa getmək istəməsi barədə suala cavabında məşhur aktyor zarafatla deyib: "Əgər kiməsə yuxarı qalxıb pəncərələri təmiz saxlamaq, yemək vermək və sonra təmizləmək lazımdırsa, mən bu işləri yerinə yetirə bilərəm. Hər halda, təcrübə ilə bağlı bir şey var. Düşünürəm ki, zamana ehtiyacımız var. Mən bilirəm ki, insanlar kosmosa uça və enə bilərlər və bu, gözəl bir şeydir. Amma məncə, sonsuz kainat haqqında düşünmək üçün orada bir az daha çox vaxt keçirmək lazımdır”.
Bölmənin digər xəbərləri
