METRONUN “BAKI SOVETİ” STANSİYASINDA TAKTİKİ TƏLİM KEÇİRİLMİŞDİR
Təlim planına əsasən, gecə saat 02:13-də “Bakı Soveti” və “Sahil” stansiyaları arasında qatarda “partlayış” baş vermiş, hadisədən dərhal sonra metropoliten əməkdaşları lazımi qurumları məlumatlandırmış və sərnişinləri “xilas etməyə” başlamışlar. Təxminən 10 dəqiqə keçmiş hadisə yerinə FHN-nin yanğınsöndürmə qüvvələri cəlb olunmuş, dərhal qərargah yaradılmış və hadisə haqqında ilkin məlumatlar əldə olunmuşdur. FHN-nin əməkdaşları və yanğınsöndürənlər “partlayışdan” sonra qatarda baş verən “yanğının” qarşısını almaq və sərnişinləri “xilas etmək” üçün metro stansiyasına daxil olmuşlar. Daxili İşlər Nazirliyinin qüvvələri stansiya yaxınlığında vəziyyətə nəzarət edirdilər.
Şərti terror aktı nəticəsində 60 nəfər “həlak olmuş”, 250 nəfər “yaralanmışdır”. 500-dən çox adam isə “xilas edilmişdir”. “Yaralılar” təcili tibbi yardım maşınları ilə xəstəxanaya çatdırılmışlar. Təlim gecə saat 03:25-də başa çatmışdır. Daxili İşlər Nazirliyi şərti terrorçunun axtarışına başlamışdır.
Taktiki təlimlərə 43 texnika, 935 nəfər cəlb olunmuşdu. Onlardan 375-i xilasedicilər, 580 nəfəri isə şərti sərnişinlər idi.
Fövqəladə hallar naziri Kəmaləddin Heydərov, daxili işlər naziri Ramil Usubov və Bakı Metropoliteninin rəisi Tağı Əhmədov xüsusi quraşdırılmış monitordan təlimin gedişini izləmişlər.
Kəmaləddin Heydərov jurnalistlərlə söhbətində təlimin Daxili İşlər və Səhiyyə nazirlikləri ilə hazırlanmış plana əsasən həyata keçirildiyini və əməkdaşların işindən razı qaldığını bildirmişdir.
Ramil Usubovun sözlərinə görə, polis əməkdaşları öz vəzifə borclarını yüksək səviyyədə yerinə yetirmiş, hadisələrin gedişində plan üzrə, dəqiqliklə hərəkət etmişlər.
