MİCROSOFT KORPORASİYASI BAKIDA RƏSMİ NÜMAYƏNDƏLİYİNİ AÇMIŞDIR

01.03.2006 [23:44]
Çap et
A⁺ A^-

AZƏRTAC xəbər verir ki, dünya şöhrətli Microsoft korporasiyası Azərbaycanda rəsmi nümayəndəliyini açmışdır. Bu münasibətlə keçirilən mərasimdə nümayəndəliyin baş direktoru Vladimir Çaykovski, rabitə və informasiya texnologiyaları naziri Əli Abbasov, təhsil naziri Misir Mərdanov, ABŞ-ın ölkəmizdəki səfiri Rino Harniş, Prezidentin İcra Aparatının informasiya resursları və texnologiyaları mərkəzinin rəhbəri Elmir Vəlizadə və Microsoft korporasiyasının MDB ölkələrində baş direktoru Sergiuş Viza dünyada informasiya texnologiyaları sahəsində lider olan Microsoftun Azərbaycanda öz nümayəndəliyini açmasını Azərbaycan Prezidenti İlham Əliyevin ölkəmizdə İKT-yə, müasir kompyuter texnologiyalarının geniş tətbiqinə, informasiyalı, yüksək intellektli vətəndaş cəmiyyəti qurulmasına göstərdiyi ardıcıl diqqət və qayğının, bu sahənin inkişafına ciddi münasibətinin, eləcə də respublikamızda yaranmış sabitliyin, azad sahibkarlığın tərəqqisi, xarici sərmayələrin beynəlxalq tələblərə uyğun fəaliyyəti üçün normal şəraitin, münbit, perspektivli daxili bazarın mövcud olmasının nəticəsi hesab etdiklərini bildirmişlər.

Microsoftun öz proqramlarının tətbiqinə Cənubi Qafqazda birinci olaraq Azərbaycanda başlamasının ölkəmizin nüfuzunun yüksəlməsinə, intellektual mülkiyyətinin qorunmasına, elmin, təhsilin, rabitə texnologiyalarının daha sürətli inkişafına, ölkəmizin Avropa və dünya informasiya məkanına inteqrasiyasının miqyasına kömək edəcəyi vurğulanmışdır. Çıxışlarda Microsoftun proqramlarının Azərbaycan dilində lokallaşdırılmasına, dilimizin zənginliyindən bacarıqla istifadə etməklə, elektronika sisteminə uyğunlaşdırılmasına başlandığı da diqqətə çatdırılmışdır.

Natiqlər korporasiyanın rəhbəri Bil Geytsin nəinki dünyanın ən varlı, həm də ən xeyirxah insanlarından biri olmasını xatırladaraq, Microsoftun ölkəmizin ağrılı sosial problemlərinin həllinə də yardımçı olacağına inamlarını ifadə etmişlər.

Korporasiyanın rəhbərləri 1997-ci ildən əməkdaşlıq etdikləri azərbaycanlı tərəfdaşlarından razılıqlarını bildirmiş, ölkəmizdə qəbul edilmiş informasiya-kommunikasiya texnologiyaları üzrə Dövlət Proqramının uğurla həyata keçirilməsində Azərbaycan hökumətinə fəal yardım göstərəcəklərini vəd etmişlər.

Rəsmi açılış mərasiminin iştirakçıları Microsoftun nümayəndəliyinə fəaliyyətində uğurlar arzulamışlar.