İDMAN
MİLLİ OLİMPİYA KOMİTƏLƏRİ ASSOSİASİYALARININ BAŞ ASSAMBLEYASI ÖZ İŞİNİ BAŞA ÇATDIRMIŞDIR
Xəbər verdiyimiz kimi, mayın 21-dən 25-nə kimi Malayziyanın paytaxtı Kuala-Lumpur şəhərində Milli Olimpiya Komitələri Assosiasiyasının (MOKA) XIII Baş assambleyası keçirilmişdir. Azərbaycan Milli Olimpiya Komitəsinin prezidenti, Milli Məclisin deputatı İlham Əliyev assambleyanın işində iştirak etmişdir.
Milli Olimpiya Komitələri Assosiasiyasının Kuala-Lumpur toplantısı bu təşkilatın hesabat-seçki tədbiri idi.
Mayın 21-də Kuala-Lumpurda Avropa Olimpiya Komitəsinin növbədənkənar assambleyası keçirilmiş, Beynəlxalq Olimpiya Komitəsində (BOK) Milli Olimpiya Komitələri Assosiasiyasını Avropadan təmsil edəcək namizədlər seçilmişdir.
Mayın 22-də MOKA-nın Baş assambleyası öz işini davam etdirmişdir. Həmin gün MOKA-nın qitələr üzrə vitse-prezidentlərinin raportları və Assosiasiya komissiyalarının fəaliyyəti haqqında məlumatlar dinlənilmişdir. Günün ikinci yarısında MOKA prezidentinin seçkiləri keçirilmişdir. Mario Vaskes Rana yenidən MOKA-nın prezidenti seçilmişdir.
Mayın 22-də Azərbaycan MOK-un prezidenti İlham Əliyevin bir sıra işgüzar görüşləri olmuşdur. MOKA-nın prezidenti Mario Vaskes Rana ilə görüşdə Azərbaycan Olimpiya Komitəsinin fəaliyyəti, respublikada olimpiya hərəkatının genişləndirilməsi sahəsində son illərdə əldə etdiyi uğurlar, komitənin gələcək fəaliyyəti barədə söhbət getmişdir. Cənab Mario Vaskes Rana Azərbaycan MOK-un gördüyü işləri yüksək qiymətləndirmiş, onun təcrübəsinin yayılmasının vacibliyini vurğulamışdır. Görüşdə MOKA ilə Azərbaycan MOK arasında əlaqələrin və əməkdaşlığın daha da genişləndirilməsinə dair fikir mübadiləsi aparılmışdır. Mario Vaskes Rana hələ 1997-ci ildə Azərbaycan Prezidenti Heydər Əliyevin olimpiya hərəkatının və idmanın inkişafında böyük xidmətləri olan görkəmli dövlət xadimlərinə MOKA-nın verdiyi “Olimpiya ləyaqəti” mükafatına layiq görüldüyünü bildirmiş və həmin mükafatı Azərbaycan Milli Olimpiya Komitəsinin prezidenti İlham Əliyev verərək, onun Azərbaycan Prezidentinə təqdim olunmasını xahiş etmişdir.
Azərbaycan Milli Olimpiya Komitəsinin prezidenti İlham Əliyev ilə Avropa Olimpiya Komitəsinin prezidenti Mario Peskante arasında görüş də işgüzar və səmimi şəraitdə keçmişdir. Görüşdə MOK-un ölkə daxilindəki fəaliyyəti və qitə təşkilatının tədbirlərində iştirakı barədə söhbət getmişdir. Cənab Mario Peskante Azərbaycana səfərini xatırlamış, ötən müddətdə MOK-un gördüyü yeni işlərdən məmnun olduğunu söyləmiş, Azərbaycanda olimpiya hərəkatının və idmanın yüksək surətlə inkişafını alqışlamışdır.
MOK-un prezidenti İlham Əliyevin növbəti görüşü BOK-un vitse-prezidenti Vitali Smirnovla olmuşdur. Səmimi və işgüzar şəraitdə keçən bu görüşdə beynəlxalq olimpiya hərəkatının bir çox məsələləri ətrafında söhbət getmiş, MOK ilə BOK arasında əlaqələrin genişləndirilməsi yolları müzakirə olunmuşdur.
Elə həmin gün İlham Əliyev AOK-un baş katibi Patrik-Hikey ilə bir sıra ölkələrin milli olimpiya komitələrinin prezidentləri ilə görüşmüşdür. Bu görüşlərdə də MOK-un fəaliyyətindən, olimpiya hərəkatının inkişafı sahəsində əldə etdiyi nailiyyətlərdən söhbət getmiş, təcrübə mübadiləsi aparılmışdır.
İlham Əliyev Kuala-Lumpurda Beynəlxalq Ağırlıqqaldırma Federasiyasının prezidenti Tomas Ayanla da görüşmüşdür. Cənab Tomas Ayan bu yaxınlarda Azərbaycana səfərini xatırlayaraq, ölkə çempionatı barədə təəssüratını danışmış, səfərindən cəmi bir il keçməsinə baxmayaraq, respublikada idman sahəsində olduqca böyük irəliləyişin baş vermədiyini vurğulamışdır. O, Azərbaycanda ağır atletika üzrə nəinki Avropa, hətta dünya çempionatlarının keçirilməsi üçün hər cür şəraitin olduğunu bildirmişdir.
Milli Olimpiya Komitəsinin prezidenti İlham Əliyev cənab Tomas Ayanın Azərbaycana səfəri zamanı Bakıda olmamasına təəssüfləndiyini bildirmiş, ölkədə idman və olimpiya hərəkatıının inkişafı barədə xoş sözlərinə görə ona təşəkkür etmişdir. İlham Əliyev əmin olduğunu bildirmişdir ki, Beynəlxalq Ağırlıqqaldırma Federasiyasının Azərbaycanla əlaqələri bundan sonra da daha sıx şəkildə inkişaf edəcəkdir.
Mayın 23-də Milli Olimpiya Komitələri Assosiasiyasının XIII Baş assambleyası öz işini davam etdirmişdir. İştirakçılar gündəlikdə olan bir sıra məsələləri müzakirə etmişlər. MOKA-nın prezidenti Mario Vaskes Rana milli olimpiya komitələrinin olimpiya hərəkatının inkişafı sahəsindəki fəaliyyətindən danışarkən Azərbaycan MOK-un gördüyü işləri, əldə etdiyi nailiyyətləri xüsusi vurğulamışdır. O, Azərbaycan Milli Olimpiya Komitəsinin MOKA-nın xüsusi mükafatına layiq görüldüyünü bildirmiş və mükafatı MOK-un prezidenti İlham Əliyevə təqdim etmişdir. Mükafatın üzərində bu sözlər yazılmışdır: “Azərbaycan Respublikası Milli Olimpiya Komitəsi olimpiya ideallarının bütün dünyada yayılması və idmanın inkişafında görkəmli xidmətlərinə görə təltif olunur”.
Həmin gün Azərbaycan MOK-un prezidenti İlham Əliyev BOK-un prezidenti Jak Roqqun iqamətgahında onunla görüşmüşdür. Cənab Jak Roqq Azərbaycanda idmanın inkişafından, olimpiya hərəkatının genişlənməsindən, ölkəmizdə yeni idman komplekslərinin, qurğularının tikintisi sahəsində əldə olunmuş nailiyyətlərdən, Azərbaycanda bir sıra mötəbər beynəlxalq yarışların yüksək səviyyədə təşkil edilib keçirilməsindən xəbərdar olduğunu bildirmişdir.
O demişdir ki, sərbəst güləş üzrə 45-ci Avropa çempionatının nəticələri Azərbaycanda belə yüksək səviyyəli yarışların təşkili və keçirilməsi üçün hər cür şərait olduğunu təsdiq edir. BOK-un prezidenti Azərbaycanda olimpiya hərəkatının genişlənməsindən böyük məmnunluq duyduğunu vurğulamışdır.
Azərbaycan MOK-un prezidenti İlham Əliyev son vaxtlar ölkəmizdə idmanın, olimpiya hərəkatının inkişafı sahəsində görülən işlər, həyata keçirilən tədbirlər barədə geniş məlumat vermişdir.
Söhbət zamanı cənab Jak Roqq Azərbaycan Respublikasının Prezidenti Heydər Əliyev ilə Bakıda keçirdiyi görüşlərini məmnunluqla xatırladığını bildirmiş, onun idmana və olimpiya hərəkatına diqqət və qayğısını yüksək qiymətləndirmişdir. Cənab Jak Roqq onun salamlarını və ehtiramını Prezident Heydər Əliyevə çatdırmağı xahiş etmişdir.
Mayın 24-də Azərbaycan MOK-un prezidenti BOK-un Milli Olimpiya Komitələri ilə əlaqədar və olimpiya həmrəyliyi idarəsinin direktoru Pere Miro ilə görüşmüşdür. Görüşdə bu idarə ilə müştərək işlər barədə fikir mübadiləsi aparılmışdır.
Mayın 25-də MOKA-nın Baş assambleyası öz işini davam etdirmişdir. Həmin gün BOK-un İcraiyyə Komitəsi ilə milli olimpiya komitələri nümayəndələrinin birgə iclası keçirilmişdir. İclasda BOK-un prezidenti Jak Roqq geniş məruzə etmişdir. O, son on iki ildə Olimpiya oyunlarının proqramında əsaslı dəyişiklik edilmədiyini bildirmiş, bununla əlaqədar xüsusi müzakirənin keçirilməsinin vacibliyini söyləmişdir. Cənab Jak Roqq Olimpiya oyunları proqramına daxil edilmiş yarışların və iştirakçıların sayının artırılmaması şərti ilə oyunların proqramına yenidən baxılmasını təklif etmişdir. Geniş fikir mübadiləsindən sonra bu məsələ ilə bağlı təkliflərin toplanması və BOK-un noyabrda keçiriləcək sessiyasında geniş müzakirə edilməsi qərara alınmışdır.
Bununla da MOKA-nın XIII Baş Assambleyası öz işini başa çatdırmışdır.
Azərbaycan Milli Olimpiya Komitəsinin prezidenti İlham Əliyev mayın 26-da vətənə qayıtmışdır.