Milli Olimpiya Komitəsinin prezidenti, Milli Məclisin deputatı İlham Əliyev iyunun 12-də MOK-un inzibati binasında həndbol üzrə yığma komandaların üzvləri və respublika Həndbol Federasiyasının rəhbərliyi ilə görüşmüşdür.

İLHAM ƏLİYEV Azərbaycanın qadınlardan ibarət yığma komandasını Bakıda keçirilmiş “Çağırış kuboku” beynəlxalq turnirində qələbə münasibətilə təbrik edərək dedi:

- Çox sevindirici haldır ki, qısa müddətdə bizdə bu cür gözəl komanda yaradılmışdır və o, belə mötəbər turnirlərdə qalib gəlir. Bu, xüsusilə ona görə sevindiricidir ki, Azərbaycanda idmanın oyun növləri, o cümlədən həndbol, adətən, həmişə güclü olmuşdur. İki olimpiya çempionunun - Rəfiqə Şabanovanın və Lyudmila Şubinanın bu görüşdə iştirak etməsi buna misal ola bilər. Onlar Bakını da, Azərbaycanı da həmşə şöhrətləndirmişlər.

Ancaq müəyyən mərhələdə idmanın bir çox digər növlərindəki kimi, həndbolda da tənəzzül baş verdi. Bunun həm obyektiv, həm də subyektiv səbəbləri vardı. Lakin ən başlıcası budur ki, bütövlükdə Azərbaycan idmanının, o cümlədən həndbolun şöhrətini qısa müddət ərzində bərpa etmək mümkün oldu. Son illər bizim böyük nailiyyətlərimiz var, çoxlu qələbələr, medallar qazanılmışdır və cəmiyyətimiz, azarkeşlər qələbələrə bir növ vərdiş etmişlər. Bu isə üzərimizə daha böyük məsuliyyət qoyur. Hərçənd, idman idmanlığında qalır və burada heç də həmişə qələbə qazanmaq mümkün olmur.

Lakin indi Azərbaycan idmanının ənənələrinin dirçəldiyini nəzərə alaraq, inanıram ki, həndbolda da, başqa növlərdə də hələ çox qələbələrimiz olacaqdır. İdmanın oyun növləri daha mürəkkəbdir. Təkbətək idman növlərində də yüksək yerlər tutmaq asan deyil, ancaq idmanın oyun növlərində böyük rəqabət var. Əgər təkbətək növlərdə müxtəlif çəki dərəcələri vardırsa, komandanın bir üzvü qalib gələ, digər üzvü uduza bilərsə, idmanın oyun növlərində belə şeylər yoxdur. Burada komanda qalib gəlir. Ona görə də sizin bu qələbəniz göstərir ki, Azərbaycan idmanın oyun növlərində müvəffəqiyyətə nail olur. Bütün bunlar Azərbaycan idmanının, ümumən ölkəmizin nüfuzunu daha da yüksəldir.

Mən sizin oyununuza məmnuniyyətlə baxırdım və sevindirici haldır ki, komanda yüksək ustalıq nümayiş etdirirdı, axı sizin rəqibləriniz zəif deyildi. Komandanın səviyyəsinin yüksəlməsi göz qabağındadır. Bunda ilk növbədə Həndbol Federasiyasının böyük xidməti var. Biz Heydər Babayevi federasiyanın rəhbəri vəzifəsinə tövsiyə etdikdə, orada vəziyyətin ağır olması heç kimə sirr deyildi. O, federasiyanın işini qısa müddətdə canlandırdı. Bizdə, əslində, bütün federasiyalarda elə bir təcrübə yaranmışdır ki, bu qurumlara nüfuzlu adamlar rəhbərlik edirlər və onların ətrafında idmanın konkret növləri üzrə mütəxəssislər, məşqçilər işləyirlər. Məhz bu amillərin vəhdəti müvəffəqiyyətin rəhnidir.

Azərbaycanda idman ictimai həyatda mühüm amilə çevrilmişdir. Biz buna çalışırdıq. Məqsədimiz bu idi ki, idmançılara hörmət bəsləsinlər, onlarla fəxr etsinlər, gənclər, yeniyetmələr, uşaqlar idmanla məşğul olmağa çalışsınlar. İndi bütün bunlar Azərbaycanda baş verir, insanların şüurunda belə bir fikir möhkəmlənir ki, idmançı layiqli peşədir.

MOK-un prezidenti Azərbaycanda qadın həndbolçuların hazırlanmasında olimpiya çempionları Rəfiqə Şabanova və Lyudmila Şubinanın əməyini yüksək qiymətləndirdi. O, idmançı qızları əmin etdi ki, MOK onlara həmişə kömək göstərəcəkdir.

Sonra Azərbaycan Həndbol Federasiyasının prezidenti Heydər Babayev çıxış edərək, ölkəmizdə idmanın bütün növlərinin inkişafına daimi dəstək verdiyinə görə İlham Əliyevə təşəkkürünü bildirdi. O, federasiyanın fəaliyyətindən danışdı və Azərbaycanda həndbolun güclü ənənələri olduğunu vurğulayaraq dedi ki, kişi və qadın komandalarının gücləndirilməsi sahəsində görülən bütün işlər həmişə MOK prezidentinin diqqət mərkəzində olmuşdur. Heydər Babayev əmin etdi ki, federasiya əldə olunmuş nailiyyətlə kifayətlənmək fikrində deyil və Azərbaycanı istər komanda turnirlərində, istərsə də çempionatlarda layiqincə təmsil edəcəkdir.

Qadınlardan ibarət yığma komandanın baş məşqçisi Rəfiqə Şabanova və komandanın kapitanı Reyhan Nəbiyeva komandaya daimi qayğıya görə, idman veteranlarına yardıma görə MOK prezidenti İlham Əliyevə təşəkkürlərini bildirdilər və onu əmin etdilər ki, Azərbaycan hədbolunun beynəlxalq aləmdə layiqincə təmsil olunması üçün qüvvələrini əsirgəməyəcəklər.

Rəfiqə Şabanova komandanın qazandığı kuboku göstərdi və onun surətini İlham Əliyevə hədiyyə etdi. O, MOK prezidentinə turnirin final görüşünün çəkildiyi videokasset də bağışladı.

MOK prezidenti və görüş iştirakçıları xatirə şəkli çəkdirdilər.

Görüşdə gənclər, idman və turizm naziri Əbülfəz Qarayev iştirak edirdi.

AZƏRTAC

Foto Namiq Məmmədovundur