Bakı, 5 iyul, AZƏRTAC

İyunun 15-də ABŞ Dövlət katibinin köməkçisi Filip Rikerin vasitəçiliyi ilə Ermənistan hökuməti Ağdam rayonundakı minalanmış ərazilərin xəritəsini təqdim edib və bu zaman Azərbaycan tərəfi bunun əvəzinə ötən ilin noyabrın 10-da keçən gecə imzalanan üçtərəfli Bəyanatdan sonra Ermənistan tərəfindən Azərbaycan ərazisinə göndərilən və sərhədlərimizi pozduğuna görə həbs edilən 15 nəfəri təhvil verib.

Bu barədə AZƏRTAC-a açıqlamasında UNEC-in nəzdində Sosial- İqtisadi Kollecin tərbiyə işləri üzrə direktor müavini Zaur Vəliyev məlumat verib. O qeyd edib ki, Ermənistan həmin bəyanatdan sonra Qarabağa öz hərbçilərini yollayıb və onlar da diversiyalar, terror aktları, yanğınlar törədiblər. ABŞ-ın vasitəçiliyi ilə alınan həmin xəritədə 97 mindən artıq piyada və tank əleyhinə minaların basdırıldığı koordinatlar göstərilib. 2021-ci il iyulun 3-də Rusiya Federasiyasının təşəbbüsü ilə Ermənistan işğal dövründə Füzuli və Zəngilan rayonlarında basdırdığı təqribən 92 min tank və piyada əleyhinə minalara dair xəritələri Azərbaycan tərəfinə təqdim edib. Bu dəfə də Azərbaycan tərəfi həmin xəritənin əvəzinə sərhədlərimizi pozduğuna görə həbs etdiyi və CM-nin bir necə maddəsi ilə məhkəmə qərarı ilə həbs olunan 15 nəfəri təhvil verdi. Mina xəritələrinin əldə edilməsi işğaldan azad olunmuş ərazilərimizdə Azərbaycan Prezidenti tərəfindən əsası qoyulan tikinti və yenidənqurma layihələrinin həyata keçirilməsini və məcburi köçkünlərin qayıdışı prosesini sürətləndirəcək. Füzuli və Zəngilan ərazisindəki mina xəritələrinin əldə edilməsi Prezident İlham Əliyevin diplomatik məharəti və Azərbaycan diplomatiyasının növbəti uğuru kimi qiymətləndirilir. Bəli, bu belədir. Regionda sülh və sabitliyin qarantına çevrilən Azərbaycan məhz Prezident İlham Əliyevin apardığı diplomatik məharəti ilə bir-birinin ardınca uğur qazanmaqdadır. İlk əvvəl ABŞ və Gürcüstanın vasitəçiliyi ilə Ağdamın mina xəritələri əldə ediləndə bəzi dairələrdə bu narazılığa səbəb olub. Lakin sonra məlum oldu ki, mina xəritələrin verilməməsi nəticəsində işğaldan azad olunan ərazilərə qayıdış gecikəcəkdir. Zəngilan və Füzulinin mina xəritələrinin əldə olunması bizə daha çevik, daha tez şərait qurmağa imkan yaradacaq. Bölgədə həyata keçirilən və keçirilməsi nəzərdə tutulan strateji əhəmiyyətli infrastruktur layihələri Ağdam və Füzulu rayonlarının ərazisindən keçir. Ən önəmlisi isə Zəngəzur dəhlizi layihəsinin tez bir zamanda gerçəkləşməsi üçün sözügedən rayonlardakı bərpa, yenidənqurma işlərinin sürətlə reallaşdırılmasına ehtiyac var və bu, bölgənin gələcəyi üçün də həyati əhəmiyyətə malikdir. Füzuli və Zəngilan çox vacib ərazilərdə yerləşirlər. Bir sıra layihələri rahat həyata keçirmək üçün ərazilərin təmizlənməsi vacibdir. Bu xəritələrin əldə edilməsi çox vacib idi.

Ağdam, Füzuli və Zəngilan rayonlarında minalara dair xəritələrin təqdim edilməsi, həmçinin başqa reallığı da ortaya çıxardıb. Belə ki, erməni tərəfi ilk olaraq onlarda mina xəritəsinin olmadığını bildirirdilər və bunun yubadılması nəticəsində bu günədək işğaldan azad olunan torpaqlarımızda onlarca insan həlak olub. Ağdam istiqamətində xəritələrin verilməsinə qədər İrəvan onlarda belə bir xəritələrin olmadığını iddia edirdi. Lakin 3 istiqamətdə 200 minədək minanı əhatələyən xəritələrin verilməsi Ermənistan hakimiyyətinin saxtakarlığını və 8 aydır ki, dünya ictimaiyyətini aldatdığını ortaya çıxardı. Bu isə o deməkdir ki, rəsmi İrəvan artıq onlarda minalanmış ərazilərin xəritələrinin olmadığı kimi absurd iddia irəli sürə bilməyəcək və yaxın dövrlərdə ermənilər Cəbrayıl, Laçın, Kəlbəcər, Ağdərə, Xocavənd və Xocalı istiqamətlərində də xəritələri verməyə məhkumdur.