Moldovada böhtan xarakterli qanunsuz nəşrlərin çap olunduğu gizli mətbəə aşkar edilib
Kişineu, 25 sentyabr, AZƏRTAC
Moldovada hüquq-mühafizə orqanları qanunsuz xarakter daşıyan və təhrikedici ifadələr ehtiva edən materialların hazırlanması və yayılması ilə məşğul olan gizli mətbəəni aşkar edərək neytrallaşdırıblar. Mətbəə paytaxtdakı binalardan birində fəaliyyət göstərib və giriş-çıxışa nəzarət sistemləri ilə təchiz edilib.
AZƏRTAC MOLDPRES agentliyinə istinadla xəbər verir ki, Baş Polis Müfəttişliyi (BPM) gizli mətbəədə dövlət qurumlarını pisləyən ifadələr, dini ədavətin qızışdırılması, rumın və rus dillərində təbliğat aparmaqla ictimai rəyə təsir etmək cəhdləri olan materialların çap olunduğunu vurğulayır.
“Çap fəaliyyəti hər ikisi Oknitski rayonundan olan 36 və 48 yaşlı iki kişi tərəfindən həyata keçirilib. Onlar bildiriblər ki, qəzetlər ölkənin şimal bölgəsində paylanmalı idi. Prosesə isə Moldova Metropoliyası ilə əlaqəli olan və seçkiqabağı yarışda iştirak edən siyasi partiyanı dəstəkləyən ruhani lider rəhbərlik edirdi”, - deyə BPM bildirib.
Araşdırma zamanı 33 və 47 yaşlı daha iki kişi müəyyən edilib.
“Onlar nəşrlərdən birinin 18 min 800 nüsxədən çox tirajını Beltsıdakı anbarda saxlayıblar. Saxlanılan üç nəfərdən biri dindirilmə zamanı “Avrasiya” QHT-nin dəvəti ilə Rusiya Federasiyasında olduğunu etiraf edib”, - deyə BPM qeyd edib.
İş üzrə araşdırma aparılır.
Xatırladaq ki, sentyabrın 28-də Moldovada parlament seçkiləri keçiriləcək.
AZƏRTAC-ın xüsusi müxbiri
Kişineu
Bölmənin digər xəbərləri
