MOSKVADA BAŞ VERMİŞ FACİƏ QURBANLARININ AİLƏLƏRİNƏ MADDİ YARDIM EDİLİR
Moskvanın Basman bazarının tavanının çökməsi nəticəsində həlak olmuş 23 nəfər Gəncə sakininin dəfn və yas mərasimləri ölkəmizin başçısının tapşırığı ilə dövlət vəsaiti ilə həyata keçirilmişdir. Bütün bu işlərin icrası üçün şəhər icra hakimiyyətində yaradılan komissiya hazırda fəlakət qurbanlarının ailələri ilə əlaqə saxlayır, onların ehtiyaclarının ödənilməsi üçün təşkilati tədbirlər görür. Bu işdə şəhər ictimaiyyətinin nümayəndələri də yaxından iştirak edirlər.
Şəhər icra hakimiyyətindən AZƏRTAC-ın müxbirinə demişlər ki, bu günlərdə Beynəlxalq Bankın Gəncə filialı 23 ailənin hər birinə 500 yeni Azərbaycan manatı məbləğində yardım etmişdir. Bundan başqa, Gəncədən Milli Məclisə seçilmiş deputatlar Aydın Abbasov və Vidadi Məmmədov da fəlakət qurbanlarının ailələrinə pul vəsaiti ilə kömək göstərmişlər.
