MOSKVADA FACİƏDƏN ZƏRƏR ÇƏKƏNLƏR DÖVLƏTİMİZİN BAŞÇISININ QAYĞISINI HƏR AN HİSS EDİRLƏR
Həmin gün səhər tezdən insan tələfatı haqqında xəbərlər gəlməyə başlamış və təəssüflər olsun ki, bu rəqəm saatbasaat artmışdır. Moskva hökumətinin nümayəndələri, RF Fövqəladə Hallar Nazirliyinin əməkdaşları, xilasetmə xidmətləri, Azərbaycanın Moskvadakı səfirliyinin əməkdaşları bütün gün hadisə yerində olmuşlar. Buna baxmayaraq, faciənin miqyasını, binanın damı çökərkən orada nə qədər adam olduğunu söyləmək çətin idi. Odur ki, zərər çəkən insanları xəstəxanalara daşıyan təcili yardım maşınlarını izləməkdən və xilasedicilərin uçuqların altında qalmış adamları çıxarmasına mane olmamaqdan başqa çarə yox idi.
Xilasetmə əməliyyatına rəhbərliyi Rusiyanın fövqəladə hallar naziri Sergey Şoyqu öz üzərinə götürmüşdü. Səhər tezdən hadisə yerində olan Moskvanın meri Yuri Lujkov da FHN və Moskva hökumətinin zərərçəkənlərə yardım üçün yaratdıqları əməliyyat qərargahından bir an belə uzaqlaşmırdı. Kömək barədə çağırışları eşitmək üçün bir neçə dəfə sükut dəqiqələri elan edilir, kinoloqlar uçuqların altında sağ qalanları aşkar etmək üçün itlərlə ərazini gəzirdilər. Uçuqların altından imdad səsləri eşidilirdi, bəziləri cib telefonu ilə zəng vuraraq yardım diləyirdilər. Xilasedicilər məharətlə işləyərək onları uçuqların altından çıxarırdılar.
Artıq axşama yaxın məlum oldu ki, xilasetmə əməliyyatı, əsasən, başa çatmışdır, uçuqların altından daha heç bir hənirti gəlmirdi. Buna baxmayaraq, xilasedicilər iki sutka işlərinə ara vermədilər.
Azərbaycanın Moskvadakı səfirliyinin nümayəndələri RF FHN-nin və Moskva hökumətinin əməliyyat qərargahında gecə-gündüz növbə çəkir, xilasedicilərlə daim sıx əlaqə saxlayırdılar. Onlar zərərçəkənlərə və həlak olanların qohumlarına ciddi kömək göstərirdilər. Axı çoxları öz əzizlərinin harada olduqlarını və onları necə axtarmağı bilmirdi. Həlak olanların kimliyinin müəyyənləşdirilməsinə də kömək göstərilirdi. Bu məqsədlə səfirliyin əməkdaşlarının bir qismi Moskvanın meyitxanalarına gedir və üstündə heç bir sənədi olmayan meyitlərin tanınmasında qohumlarına kömək edirdi.
Dövlətimizin başçısı İlham Əliyev faciədən və onun miqyasından xəbər tutan kimi zərər çəkmiş həmvətənlərimizə yardım göstərilməsi üçün təxirəsalınmaz tədbirlər görülməsi barədə sərəncam verdi. Azərbaycan Prezidentinin şəxsi tapşırığı ilə səhiyyə naziri Oqtay Şirəliyev və fövqəladə hallar naziri Kəmaləddin Heydərov təcili olaraq Moskvaya ezam edildilər. Onlara zərər çəkən soydaşlarımızın vəziyyəti ilə tanış olmaq, təcili tədbirlər görmək, “Azərbaycan Hava Yolları” Dövlət Konserninə isə həlak olanların cənazələrini təyyarə ilə vətənə gətirmək tapşırıldı. Azərbaycan hökuməti həlak olanların vətənə gətirilməsi və dəfn edilməsi ilə bağlı bütün xərcləri öz üzərinə götürdü, habelə həlak olanların və zərərçəkənlərin ailələrinə kompensasiyanın məbləğini müəyyənləşdirdi. Prezident İlham Əliyevin fövqəladə hallar və səhiyyə nazirlikləri, ölkəmizin Rusiyadakı səfirliyi qarşısında qoyduğu vəzifə tamamilə yerinə yetirildi.
Lakin ən mürəkkəb problem həlak olanların cənazələrinin vətənə gətirilməsi və müvafiq sənədlərin rəsmiləşdirilməsi ilə bağlı olmuşdur. Fövqəladə hallar naziri K.Heydərov bu vəzifəni Rusiya FHN ilə sıx əlaqədə yerinə yetirdi - həlak olanların hamısının cənazələri xüsusi təyyarə ilə Azərbaycana gətirildi.
Moskvaya ezam edilən nazirlər, habelə səfir P.Bülbüloğlu həmvətənlərimizin qoyulduğu xəstəxanalara gedərək, onların vəziyyəti ilə maraqlanırdılar. Xəstəxanalardakı həmvətənlərimiz qayğı və diqqətə, bu çətin anlarda mənəvi dəstəyə görə dövlətimizin başçısına və hökumətin nümayəndələrinə dərin minnətdarlıqlarını ifadə edirdilər.
Hazırda Moskva xəstəxanalarında qalan həmvətənlərimiz müalicə olunur, psixoloji bərpa kursu keçirlər. Səfirliyimiz və Ümumrusiya Azərbaycan Konqresi bu faciədən sağ çıxan insanların qeydinə qalır, tezliklə sağalması üçün mümkün olan bütün tədbirləri görürlər.
Bölmənin digər xəbərləri
