Moskvada “İrs-Nasledie” jurnalının növbəti nömrəsi çapdan çıxıb
Moskva, 11 mart, AZƏRTAC
Moskvada “İrs-Nasledie” jurnalının növbəti nömrəsi çapdan çıxıb.
AZƏRTAC xəbər verir ki, ənənəvi olaraq, bu nəşrin 2023-cü ildəki ilk buraxılışı baş redaktor Musa Mərcanlının məqaləsi ilə açılır. Müəllif xatırladır ki, bu il Azərbaycanda rəsmi olaraq “Heydər Əliyev İli” elan edilib. Xalqımız Ümummilli Liderinin anadan olmasının 100 illiyini qeyd edir.
Məqalədə yazılıb: “Bu il respublikamızın SSRİ-nin tərkibində olduğu zaman və müstəqilliyin bərpasından sonra xalqımızın qarşısında mühüm xidmətləri olmuş Azərbaycanın dövlət xadiminə həsr olunur. Mürəkkəb bir dövrdə ölkəyə rəhbərlik etmiş Heydər Əliyevin siyasi müdrikliyi və diplomatik məharəti sayəsində Azərbaycan 90-cı illərin birinci yarısında hərbi-siyasi böhranı aşa bilib, sabitlik və inkişaf yoluna qədəm qoyub”.
Jurnalın bu nömrəsində tarix elmləri namizədi Eldar Abbasovun yazısı dərc olunub. Məqalədə Heydər Əliyevin SSRİ-nin mövcudluğunun son illərində Qarabağın dağlıq hissəsinin Ermənistana verilməsinə can atan erməni millətçilərinin əməllərinə qarşı mübarizəsindən bəhs edilir. Arxiv sənədləri əsasında hazırlanmış bu materialın birinci hissəsində erməni millətçilərinin SSRİ-nin ali partiya və dövlət orqanlarına göndərdikləri məktub və müraciətlər, o cümlədən SSRİ Ali Məhkəməsinə iddia ərizəsi və SSRİ baş prokurorunun adına məktub vasitəsilə təşkil etdikləri Heydər Əliyevin nüfuzdan salınması kampaniyasından bəhs olunur.
Jurnalın bu nömrəsində orta əsrlər memarlığı həvəskarları üçün XIII-XV əsrlərdə Cənubi Qafqazın türk dövlətlərinin əyanlarının dəfn edildiyi Qarabağ türbələrinin arxitektura xüsusiyyətləri haqqında material dərc olunub. Bundan başqa, Azərbaycanın qədim “daş yollarına” həsr olunmuş məqalə də oxucuların marağına səbəb olacaq. Bu yazıda qeyd olunub ki, həmin yolların analoji formaları Aralıq dənizi ölkələrində də geniş yayılıb və hələ ki, onların mənşəyini müəyyən etmək mümkün olmayıb.
Nəşrin bu il çapdan çıxmış birinci nömrəsində Azərbaycan haqqında müxtəlif informasiyaları ehtiva edən materiallar - filologiya elmləri doktoru, Moskva Dövlət Beynəlxalq Münasibətlər İnstitutunun professoru, Rusiya Elmlər Akademiyası A.M.Qorki adına Dünya Ədəbiyyatı İnstitutunun aparıcı elmi işçisi Abuzər Bağırovun şair Osman Sarıvəlliyə həsr olunmuş və sənətşünas Toğrul Əfəndiyevin SSRİ-nin Xalq rəssamı Asəf Cəfərov haqqında məqalələri və digər yazılar dərc edilib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
