Moskvada Üzeyir Hacıbəylinin 140 illik yubileyinə həsr olunmuş beynəlxalq konfrans keçiriləcək
Moskva, 14 oktyabr, AZƏRTAC
Oktyabrın 31-də Rusiya Teatr Sənəti İnstitutunun (GİTİS) Elmi Kitabxanasında dahi Azərbaycan bəstəkarı, sənətşünas, pedaqoq, maarifçi Üzeyir Hacıbəylinin anadan olmasının 140 illiyinə həsr olunmuş “Xalqın ruhunun səsi...” adlı beynəlxalq konfrans keçiriləcək.
AZƏRTAC xəbər verir ki, tədbir GİTİS-in Üzeyir Hacıbəyli adına Azərbaycan Musiqi Akademiyası ilə birgə “Prioritet 2030” strateji akademik liderlik proqramı çərçivəsində təşkil olunur.
İştirakçılar Üzeyir Hacıbəylinin musiqi mədəniyyətinin inkişafına verdiyi töhfə, onun islahatçı ideyalarını və Azərbaycan, sovet və dünya musiqi sənətinə təsirini müzakirə edəcəklər.
Konfrans bu mövzuları əhatə edəcək: Azərbaycan xalq musiqi mədəniyyəti Üzeyir Hacıbəyli yaradıcılığının əsası kimi; onun əsərlərində Azərbaycan xalq musiqisi ilə Avropa ənənəsinin qarşılıqlı əlaqəsi; bəstəkarın ilk milli opera truppasının və Azərbaycan opera məktəbinin banisi kimi rolu; Üzeyir Hacıbəylinin Azərbaycan musiqi təhsilinin banisi kimi əhəmiyyəti; bəstəkarın irsi və musiqili teatrın inkişafı.
Konfransda Azərbaycan və Rusiyadan nümayəndələr, tanınmış mədəniyyət və incəsənət xadimləri, musiqişünaslar, müəllimlər, tədqiqatçılar iştirak edəcəklər.
Konfrans əyani və onlayn formatlarda keçiriləcək.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
