Müəllim: Xocalı faciəsini düzgün şəkildə şagirdlərə çatdırmaq borcumuzdur
Bakı, 26 fevral, AZƏRTAC
Pedaqoji fəaliyyətlə məşğul olduğum 20 il ərzində yüzlərlə şagirdi yola salmışıq. Biz müəllimlərin ən böyük borclarından biri isə şagirdlərə tariximizi, xüsusilə də Xocalı faciəsini düzgün şəkildə çatdırmaq, onlarda vətənpərvərlik hisslərini formalaşdırmaqdır.
Bunu AZƏRTAC-a müsahibəsində Nizami rayonu 210 nömrəli məktəbin tarix müəllimi Mirvari Şükürova deyib.
“Biz yalnız ildönümü günlərində deyil, ilin müxtəlif vaxtlarında tədbirlər keçirərək Xocalıda baş verənləri şagirdlərimizə xatırlatmışıq. Çalışmışıq ki, bunu sadəcə dərs mövzusu kimi yox, qan yaddaşı kimi onların yaddaşına həkk edək. Uşaqlar bilməlidirlər ki, bu hadisələr tarix kitablarında yazılan adi faktlar deyil, xalqımızın yaşadığı böyük bir faciədir. Mütəmadi olaraq müxtəlif layihələr həyata keçirmişik. Qardaş Türkiyə, eləcə də Avropanın bir sıra ölkələri ilə birgə layihələrimiz olub. Həmin layihələrdə Xocalı faciəsini və 20 Yanvar hadisələrini xüsusi olaraq qabartmışıq. Şagirdlərimiz bu hadisələr haqqında təqdimatlar hazırlayıb, müzakirələr aparıb, xarici məktəbliləri də məlumatlandırıblar. Həmçinin maarifləndirmə tədbirləri çərçivəsində ölkəmizdə uşaqlar turistlərə yaxınlaşıb, onlara Xocalı faciəsi haqqında suallar veriblər. Bilməyənlərə broşürlər paylayıb, xarici dillərdə məlumat veriblər. Bu gün də həmin təbliğat işlərini davam etdiririk”,- deyə müəllim vurğulayıb.
O qeyd edib ki, Xocalıda baş verənlər soyqırımıdır. Eyni zamanda, qürur hissi ilə Xocalının işğaldan azad edildiyini vurğulayıb:”Soyqırımı qurbanlarının qisası layiqincə alınıb. Buna görə Prezident, Ali Baş Komandan İlham Əliyevə, Birinci vitse-prezident Mehriban Əliyevaya, rəşadətli Azərbaycan Ordusuna dərin təşəkkürümüzü bildiririk. Fəxr edirik ki, Xocalı ilə bağlı ədalət bərpa olunub”.
Bölmənin digər xəbərləri
