“Naftoqaz”: Rusiya müharibənin əvvəlindən bəri Ukraynanın qaz infrastrukturuna ən böyük zərbə endirib
Kiyev, 3 oktyabr, AZƏRTAC
Oktyabrın 3-nə keçən gecə Rusiya silahlı qüvvələri genişmiqyaslı müharibə başlayandan bəri Ukraynanın qaz hasilatı infrastrukturuna ən böyük hücumu həyata keçirib. Xarkov və Poltava vilayətlərindəki “Naftoqaz” obyektlərinə zərbələr endirilib.
AZƏRTAC bu barədə “Naftoqaz”ın bəyanatına istinadla xəbər verir.
Bəyanatda deyilir: “Düşmən genişmiqyaslı müharibə başlayandan bəri qaz hasilatı infrastrukturuna ən böyük hücumu həyata keçirib”.
Həmin gecə Rusiya silahlı qüvvələri Xarkov və Poltava vilayətlərindəki “Naftoqaz” obyektlərinə xeyli sayda ballistik raket də daxil olmaqla 35 raket və 60 pilotsuz uçuş aparatı ilə hücum edib.
“Biz onlardan bəzilərini vura bildik, amma təəssüf ki, hamısını deyil. Bu hücum nəticəsində xeyli sayda obyektimizə ziyan dəyib. Zərərlərin bir hissəsi kritik olub”, -deyə şirkət əlavə edib.
“Naftogaz Group”un baş direktoru Sergey Koretski qeyd edib ki, ərazidə hücumun nəticələrinin aradan qaldırılması üzrə işlər davam edir. O qeyd edib: “Biz bu hücuma və onun ümumi vəziyyətə təsirinə operativ və adekvat cavab verilməsini təmin etmək üçün Ukraynanın tərəfdaşları ilə işləyirik. Terrorizm heç bir yerdə öz məqsədlərinə çatmamalıdır”.
Xatırladaq ki, oktyabrın 2-dən 3-nə keçən gecə Rusiya Ukrayna ərazisinə müxtəlif silahlar vasitəsilə növbəti zərbələr endirib. Poltava, Dnepr, Odessa və bir sıra digər bölgələrdə partlayışlar baş verib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
