Bakı, 23 sentyabr, AZƏRTAC

ABŞ-ın Milli Aeronavtika və Kosmik Tədqiqatlar Agentliyi (NASA) 1999-cu ildə kəşf edilən “Bennu” asteroidinin Yer üçün potensial təhlükə yaratdığı barədə xəbərdarlıq edib. Kosmik agentliyin tədqiqat qrupu bildirib ki, bu asteroidi son 25 il ərzində izləyir və onun 2182-ci ilin sentyabrına qədər planetimizlə toqquşacağını proqnozlaşdırır.

AZƏRTAC NASA-nın rəsmi saytına istinadla xəbər verir ki, təhlükəli asteroid kimi tanınan “Bennu” hər altı ildən bir Yer ətrafında orbitini tamamlayır və artıq 1999, 2005 və 2011-ci illərdə planetimizlə üç dəfə yaxından qarşılaşıb. Toqquşma şansı nisbətən az olsa da, elm adamları bu ehtimalı istisna etmirlər. Bu ehtimal təxminən 0,037 faizidir.

2020-ci ilin oktyabrında NASA-nın “OSIRIS-REx” missiyası “Bennu”nun səthinə enib, burada nümunə toplayıb. 2016-cı ilin sentyabrında fəaliyyətə başlayan bu missiyanın da məqsədi həmin asteroidi araşdırmaq və Günəş sisteminin mənşəyi haqqında faydalı məlumat verməkdir.

Astrofizik Hakim Oluyesi missiyanın əhəmiyyətini şərh edərək bildirib ki, bu, tədqiqatçılara Günəş sisteminin ilkin sirlərini başa düşməyə kömək edəcək. O əlavə edib: “Bu, Günəş sisteminin sirlərini ortaya qoyacaq kəşflər, həyat üçün bioloji molekulların tapılması baxımından vacibdir. Əgər “Bennu” Yerlə toqquşsa, o, təxminən 1200 meqaton enerji buraxa bilər ki, bu da ən güclü süni nüvə silahının 24 qat gücünə bərabərdir”.