NATO-nun Baş katibi: Ukrayna sülh danışıqlarına hazırdır, indi top Rusiyanın tərəfindədir
Bakı, 15 may, AZƏRTAC
NATO-nun rəhbəri Mark Rütte cümə axşamı Antalyada keçirilən brifinqdə bildirib ki, Ukrayna sülh danışıqlarına hazırdır, lakin indi Kiyevin istəyinə müvafiq cavab vermək üçün məsuliyyət Moskvanın üzərinə düşür.
AZƏRTAC Anadolu Agentliyinə istinadla xəbər verir ki, Mark Rütte NATO xarici işlər nazirlərinin qeyri-rəsmi görüşünün keçirildiyi Türkiyənin Antalya şəhərindəki brifinqində jurnalistlərə deyib: “Ukrayna açıq şəkildə bu danışıqlara hazırdır, lakin indi top Rusiyanın meydanındadır. Ruslar İstanbula aşağı səviyyəli nümayəndə heyəti göndərir və Prezident Volodimir Zelenskinin təqdim etdiyi fürsəti əldən verir”.
Rütte təkrar edib ki, Ukrayna ilə bağlı istənilən gələcək razılaşma keçmiş danışıqların uğursuzluğundan dərs çıxararaq etibarlı və davamlı olmalıdır. O vurğulayıb: “Bu, davamlı olmalıdır. Biz 2014-2015-ci illərdə baş verənləri təkrarlaya bilmərik, mürəkkəbi qurumamış Minsk razılaşması hələ də mübahisəlidir”.
O, həmçinin beynəlxalq koordinasiyanın vacibliyini vurğulayıb və Türkiyənin də üzvü olduğu “İstəklilər Koalisiyası” da daxil olmaqla Ukraynaya dəstək verən təşəbbüslərin sayının artmasına görə minnətdarlığını ifadə edib.
Rütte NATO-nun hazırkı toplantısına ev sahibliyi edən ölkə və həmçinin Ukrayna ilə Rusiya arasında sülh danışıqları ilə bağlı sualı cavablandırarkən deyib: “Aydındır ki, Türkiyə bu məsələlərdə mühüm rol oynayır. Ankaranın çağırış gücü açıq şəkildə ortadadır. Biz bunu hər gün görə bilərik. Məncə, bu, vacibdir”.
Bölmənin digər xəbərləri
