REGİONLAR
NAXÇIVAN MUXTAR RESPUBLİKASI KƏND TƏSƏRRÜFATI NAZİRLİYİNİN GENİŞ KOLLEGİYA İCLASI OLMUŞDUR
AZƏRTAC-ın müxbiri xəbər verir ki, iclasda Muxtar Respublika baş nazirinin müavini, kənd təsərrüfatı naziri Məmməd Abbasov məruzə ilə çıxış etmişdir. O demişdir ki, cari ildə 21707 hektar sahədə keçiriləcək biçində 80 kombayn iştirak edir. Qısa müddətdə Culfa, Babək, Ordubad və Kəngərli rayonlarında 1200 hektardan çox sahədə biçin aparılmışdır. Hər hektarın məhsuldarlığı 30 sentnerdən çox olmuşdur. Hazırda taxılçılar muxtar respublikada fəaliyyət göstərən 11 dəyirmanın xidmətindən də səmərəli istifadə edirlər.
Kollegiya iclasında baytarlıq xidmətindən də ətraflı söhbət getmişdir. Qeyd olunmuşdur ki, nazirliyin baytarlıq, zoobaytar təchizatı idarəsinə yeni inzibati bina ayrılmış, dərman və biopreparatların saxlanılması üçün iki ədəd soyuducu kamera quraşdırılmış, yeni anbarlar tikilib istifadəyə verilmişdir. Muxtar respublika baytarlıq laboratoriyasının və elmi tədqiqat baytarlıq stansiyasının binaları əsaslı təmir olunmuş, Şahbuz rayon baytarlıq idarəsi və laboratoriyası üçün yeni bina inşa edilmişdir.
İclasda muxtar respublikada taxıl yığımında fermerlərə hərtərəfli kömək göstərilməsi və baytarlıq xidməti səviyyəsinin yüksəldilməsi üçün konkret tədbirlər müəyyənləşdirilmişdir.