NAXÇIVAN MUXTAR RESPUBLİKASININ 80 İLLİYİ İLƏ BAĞLI ŞAMAXIDA TƏDBİR KEÇİRİLMİŞDİR
Rayon icra hakimiyyətinin başçısı Natiq Məmmədov Muxtar Respublikanın yaranma tarixi və inkişaf mərhələləri barədə məlumat vermişdir. Qeyd edilmişdir ki, qədim Azərbaycan torpağı olan bu bölgənin sakinləri dəfələrlə ağır sınaqlarla üzləşsə də, öz mətinliyi, qüruru, rəşadəti və uzaqgörənliyi ilə buna sinə gərərək xalqımızın qəhrəmanlıq tarixinə yeni-yeni səhifələr yazmışlar. Qürur hissi ilə vurğulamaq istərdik ki, Muxtar Respublikanın inkişafı ulu öndərimiz Heydər Əliyevin adı ilə sıx bağlıdır. Ümummilli liderimizin hakimiyyətə gəldiyi vaxtdan tərəqqi edən Muxtar Respublika bu gün görkəmini tamamilə dəyişib. Ermənistan silahlı qüvvələri tərəfindən blokadaya alınmasına baxmayaraq, uğurlarını durmadan artırır. Bir sözlə, tarixi abidələri ilə seçilən Naxçıvan barəsində ümummilli liderimiz Heydər Əliyev böyük uzaqgörənliklə demişdir: “Azərbaycanın siyasi, iqtisadi, mədəni və elmi həyatında özünəməxsus rol oynayan Naxçıvanın hər daşı, hər qayası tarixin canlı şahididir”.
Tarix elmləri doktoru, professor, əməkdar elm xadimi, Milli Məclisin deputatı Yaqub Mahmudov Naxçıvanın tarixi, mədəni abidələri, inkişaf yolu, ziyalıları, qəhrəmanlığı barədə geniş məruzə ilə çıxış etmişdir. Alim demişdir ki, hər qayasında, daşında qəhrəmanlıq nişanələrini yaşadan Muxtar Respublika xalqımızın böyük bir tarixə malik olduğuna əyani sübutdur.
Respublikamızın Prezidenti İlham Əliyevin məlum sərəncamını tariximizi öyrənmək və ölkəmizi dünyada yetərincə tanıtmaq baxımından yüksək dəyərləndirən Y.Mahmudov Naxçıvanın 4 min illik şəhər mədəniyyətindən danışmışdır. Bildirmişdir ki, qədim Naxçıvan torpağı ən ağır məqamlarda dünya şöhrətli siyasi və dövlət xadimi Heydər Əliyevin dövlətçilik təcrübəsinə arxalanmaqla yeni bir inkişaf dövrünü yaşayır və inkişaf edir.
Milli Məclisin deputatı, “İki sahil” qəzetinin baş redaktoru Vüqar Rəhimzadə, Naxçıvan Muxtar Respublikasının Bakıdakı daimi nümayəndəliyinin rəhbəri Həsən Zeynalov, Azərbaycan Müəllimlər İnstitutu Şamaxı filialının prorektoru Vahid Xanəliyev və başqaları çıxış edərək milli dövlətçilik tariximizdə, torpaqlarımızın müdafiəsində, ölkəmizin dünya birliyində layiqli yerini tutmasında və inkişafında Muxtar Respublikanın misilsiz roluna aydınlıq gətirmişlər.
Sonra elmi-praktiki seminar öz işini plenar bölmələrdə davam etdirmişdir.
Bölmənin digər xəbərləri
