NAXÇIVAN ŞƏHƏRİNDƏ KƏND TƏSƏRRÜFATI MƏHSULLARININ NÖVBƏTİ SATIŞ-YARMARKASI KEÇİRİLMİŞDİR

21.09.2006 [10:40]
Çap et
A⁺ A^-

AZƏRTAC-ın müxbiri xəbər verir ki, Naxçıvan şəhərinin Xətai küçəsində kənd təsərrüfatı məhsullarının növbəti satış yarmarkası keçirilmişdir. Satış yarmarkasına muxtar respublikanın ayrı-ayrı rayonlarından gətirilmiş müxtəlif meyvə-tərəvəz, bostan və emal sənayesi məhsulları çıxarılmışdı. Bu dəfə də qiymətlər bazardakından xeyli ucuz olmuşdur.

Naxçıvan Muxtar Respublikası Ali Məclisinin sədri Vasif Talıbov yarmarkaya gəlmiş, burada xidmətin təşkili, məhsulların keyfiyyəti və qiymətləri ilə maraqlanmışdır.

O, satışa çıxarılmış yerli sənaye və ərzaq məhsullarına baxmış, ayrı-ayrı məhsulların, xüsusən də meyvə şirələrinin, sərinləşdirici içkilərin, ekoloji cəhətdən təmiz olan digər məhsulların istehsalının genişləndirilməsi ilə bağlı tövsiyələrini vermişdir.

Şəhər sakinləri Şərur, Culfa, Şahbuz, Babək və Ordubad fermerlərinin təklif etdiyi məhsulları həvəslə almışlar.