“Naxçıvan” Universitetində Nəriman Həsənzadənin yaradıcılığından bəhs olunub
Naxçıvan, 10 mart, AZƏRTAC
“Naxçıvan” Universitetində “Azərbaycan poeziyasının səmimiyyət zirvəsi Nəriman Həsənzadə - 90” mövzusunda keçirilən tədbirdə çıxış edən ali təhsil ocağının rektoru, dosent Nurlana Əliyeva şairin həyat və yaradıcılığından ətraflı söhbət açıb.
Universitetin mətbuat xidmətindən AZƏRTAC-ın Naxçıvan bürosuna bildirilib ki, rektor Nəriman Həsənzadənin məhəbbət mövzusuna üstünlük verdiyini, bununla yanaşı, tarixi mövzulu dramları ilə də diqqət çəkdiyini qeyd edib. Vurğulanıb ki, ədəbiyyatımızın görkəmli nümayəndəsinin şeirlərinə onlarla mahnı bəstələnib, tarixi dramları müxtəlif teatrların səhnəsində yer alıb.
Nurlana Əliyeva bu gün ilk dəfə olaraq beş elmi kitabxananın birgə iştirakı ilə keçirilən bu cür tədbirlərin bundan sonra da davam edəcəyini deyib.
Sonra “Naxçıvan” Universitetinin Elmi Kitabxanasının direktoru Zamin Babazadənin, Naxçıvan Dövlət Universiteti Elmi Kitabxanasının direktoru Fariz Əhmədovun, Məmməd Səid Ordubadi adına Naxçıvan Muxtar Respublika Kitabxanasının elmi katibi Günay Kəngərlinin Nəriman Həsənzadənin yaradıcılığına həsr olunmuş çıxışları dinlənilib.
“Naxçıvan” Universitetinin Azərbaycan dili və ədəbiyyat müəllimliyi ixtisasının IV kurs tələbəsi Fidan Hüseynova çıxışında Nəriman Həsənzadənin gənclər arasında sevilən şeirlərini qiraət edib.
Bölmənin digər xəbərləri
