Naxçıvanda imzalanan sənədlər vahid strateji planın ayrı-ayrı hissələrini birləşdirən halqadır - RƏY
Bakı, 26 sentyabr, AZƏRTAC
Türkiyə Prezidenti Rəcəb Tayyib Ərdoğanın Naxçıvana səfərinin Azərbaycanın Qarabağ iqtisadi rayonunun bir hissəsində uğurla həyata keçirilən antiterror tədbirləri, separatçı, cinayətkar, qanunsuz və qondarma təsisatın təmsilçilərinin və onların silahlı quldur dəstələrinin ağ bayraq qaldıraraq təslim olmalarından dərhal sonra baş tutması, ilk növbədə, Türkiyənin rəsmi Bakının qanuni addımlarına siyasi dəstəyi kimi qəbul edilməlidir. Tarixin bütün dövrlərində olduğu kimi, Azərbaycan üçün həssas olan bu mühüm zaman kəsiyində Türkiyə yenə də öz açıq və birmənalı dəstəyini ifadə edərək, iki ölkə arasındakı qardaşlıq münasibətlərinin sarsılmazlığını göz önünə sərgilədi.
Bu fikirləri AZƏRTAC-a açıqlamasında siyasi ekspert Elçin Mirzəbəyli deyib.
E.Mirzəbəylinin sözlərinə görə, səfər çərçivəsində imzalanan sənədlər də hər iki dövlətin qardaşlığını simvolizə edən liderlərinin Azərbaycan və Türkiyə ilə yanaşı, bölgənin təhlükəsiz, xoşbəxt gələcəyi ilə bağlı vahid baxış bucağına sahib olduqlarını nümayiş etdirir.
Səfər çərçivəsində prezidentlər tərəfindən imzalanan Qars-Naxçıvan dəmir yolu layihəsinə dair Niyyət Protokolunun xüsusi əhəmiyyətə malik olduğunu diqqətə çatdıran siyasi ekspert deyib: “Qars-Naxçıvan dəmir yolu Bakı-Tbilisi-Qars dəmir yolunun davamı olmaqla yanaşı, həm də Zəngəzur dəhlizinin bir hissəsi hesab oluna bilər. Zəngəzur dəhlizinin işə düşəcəyi təqdirdə Qars-Naxçıvan dəmir yolu, həm də Zəngəzur dəhlizinin bir parçasına çevriləcək ki, bu da Şərq-Qərb dəhlizi ilə Orta dəhliz arasında sinerjinin yaranması, regionun kommunikasiya imkanlarının maksimum dərəcədə genişləndirilməsi, rentabelliyin, gəlirlərin və iqtisadi fəallığın artması deməkdir.
Naxçıvanda İğdır-Naxçıvan təbii qaz kəmərinin təməlinin atılması isə, Azərbaycanla Türkiyənin həm enerji, həm də nəqliyyat dəhlizlərinin paralel şəkildə şaxələndirilməsi üzrə vahid strateji inkişaf proqramı üzrə hərəkət etdiklərini, Zəngəzur dəhlizi, Qars-Naxçıvan dəmir yolu və Bakı-Tbilisi-Qars dəmir yolunun, gələcəkdə vahid bir tamın - multimodal dəhlizin tərkib hissəsinə çevrilə biləcəyi ehtimalını yaradır”.
E.Mirzəbəylinin sözlərinə görə, Türkiyə Prezidentinin mətbuat üçün bəyanatında İğdır-Naxçıvan kəmərinin Avropanın da enerji təhlükəsizliyinə böyük töhfə verəcəyini vurğulaması, bu ehtimalın kifayət qədər yüksək olduğunu təsdiqləyir. Orta Dəhlizin multimodal xarakter daşıdığını nəzərə alsaq, bu, həm də təbii qaz kəmərlərinin şaxələndirilməsi və ötürücülüyünün artırılması baxımından mühüm strateji əhəmiyyət daşıyır. Beləliklə, Azərbaycan üçün bir neçə istiqamətdən həm ixracatçı, həm də tranzit ölkə kimi yeni imkanlar açılır ki, bu, geosiyasi konfiqurasiya elementlərinin tez-tez yerdəyişməyə məruz qaldığı bir zaman kəsiyində, ölkəmiz üçün yeni manevr və alternativ kommunikasiya imkanları deməkdir.
“Rəcəb Tayyib Ərdoğanın Naxçıvana səfəri çərçivəsində Azərbaycanla Türkiyə arasında bərpa olunan enerji mənbələrindən istehsal olunan elektrik enerjisinin ötürülməsi sahəsində əməkdaşlığa dair anlaşma memorandumu imzalanması da, qənaətimə görə, vahid strateji planın tərkib hissəsi kimi qəbul olunmalıdır. Məlum olduğu kimi, Prezident İlham Əliyev “yaşıl enerji” sektorunun inkişafına olduqca böyük önəm verir və ölkəmizin bu sahədə də qlobal oyunçuya çevrilməsi üçün ardıcıl tədbirlərin həyata keçirilməsinin təmin edilməsinə çalışır. 2022-ci il dekabrın 17-də Buxarestdə “Azərbaycan Respublikası, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Saziş”in imzalanması da bu prosesin vacib elementlərindən biri hesab oluna bilər. Bu sıraya Qarabağ və Şərqi Zəngəzurun yaşıl enerji zonası elan edildiyini, sözügedən istiqamətdə mühüm layihələrin həyata keçirilməkdə olduğunu da nəzərə alsaq, Naxçıvanda imzalanan sənədlərin vahid strateji planın ayrı-ayrı hissələrini birləşdirən halqa olduğunu söyləyə bilərik”, - deyə siyasi ekspert diqqətə çatdırıb.
Azərbaycanla Türkiyənin bütün istiqamətlərdə atdığı addımların bölgəyə sülh, əmin-amanlıq, rifah gətirdiyini vurğulayan Elçin Mirzəbəyli qeyd edib: “Harada Azərbaycan və Türkiyə varsa, orada qardaşlıq, dostluq və inkişaf var. Prezident İlham Əliyevin Naxçıvanda, mətbuat üçün bəyanatında ifadə etdiyi kimi, biz bir-birimizə dəstək verməklə, eyni zamanda, regional məsələləri də düz istiqamətə yönəldirik.
Azərbaycan və Türkiyənin müştərək maraqları bölgədə sülh, əmin-amanlığın təmin edilməsinə, suverenliyimizin qorunmasına yönəldilib”.
Bölmənin digər xəbərləri
