Nazir müavini: Azərbaycanda 5G şəbəkəsinin istifadəyə verilməsi ilə bağlı “Yol xəritəsi” hazırlanır
Bakı, 10 iyun, AZƏRTAC
Biznes Mühiti və Beynəlxalq Reytinqlər üzrə Komissiyanın Rəqəmsal İnkişaf və Nəqliyyat Nazirliyinin rəhbərlik etdiyi “Texnologiya və innovasiyalar” İşçi qrupunun növbəti iclası keçirilib.
AZƏRTAC-a nazirlikdən bildirilib ki, iclasda Komissiya Katibliyinin rəhbərliyi, İşçi qrupun rəhbəri və üzvləri, eyni zamanda özəl sektor nümayəndələri iştirak ediblər.
İclasda “Texnologiya və innovasiyalar” İşçi qrupunun 2025-ci il üzrə Fəaliyyət Planının icra statusu, tədbirlərin icrası zamanı qarşıya çıxan problemlər və müvafiq həll yolları müzakirə olunub.
İşçi qrupun rəhbəri, rəqəmsal inkişaf və nəqliyyat nazirinin müavini Samir Məmmədov Fəaliyyət Planı üzrə icra edilən layihələr və görülmüş işlər haqqında məlumatları iclas iştirakçılarına çatdırıb.
O, Ümumdünya Əqli Mülkiyyət Təşkilatı ilə müxtəlif səviyyəli görüşlərin keçirildiyini, 5G şəbəkəsinin istifadəyə verilməsi ilə bağlı “Yol Xəritəsi”nin hazırlandığını, rəqəmsal dövlət xidmətlərinin əhatə dairəsinin genişləndirildiyini, əhalinin rəqəmsal bacarıqlarının artırılması istiqamətində layihələrin davam etdiyini, yeni vençur fondlarının yaradılması üzrə işlərin aparıldığını bildirib. Həmçinin bu kimi istiqamətlərdə davam etdirilən digər layihələr və tədbirlər, görülmüş işlər və gələcək planlar barədə ətraflı məlumat verib.
Eyni zamanda 2025-ci il üzrə Fəaliyyət Planının icrasına dair yarımillik hesabatların növbəti aydan etibarən Nazirlər Kabinetinə təqdim ediləcəyini nəzərə alaraq iclasın hədəflərindən birinin həmin hesabatların tam şəkildə hazırlanmasını təmin etmək olduğunu qeyd edib.
Komissiya Katibliyinin rəhbəri Vüsal Şıxəliyev ölkənin Qlobal İnnovasiya İndeksindəki göstəricilərinin yaxşılaşdırılmasında İşçi qrupun fəaliyyətinin mühüm rol oynadığını vurğulayıb. Cari ilin Fəaliyyət Planının daha konkret hazırlandığını və Qlobal İnnovasiya İndeksinin əsas indikatorları üzrə tədbirlərin burada öz əksini tapdığını bildirib.
Həmçinin Qlobal İnnovasiyalar İndeksinin 2025-ci il üzrə buraxılışının cari ilin sentyabr ayında dərc ediləcəyini, bu səbəbdən Ümumdünya Əqli Mülkiyyət Təşkilatı tərəfindən müvafiq sorğuların və istinadların iyun ayının ortasınadək başa çatacağını nəzərə alaraq, sözügedən İşçi qrupun 2025-ci il üzrə Fəaliyyət Planında qeyd olunan müvafiq tədbirlərin icrasını sürətləndirməsinin vacibliyini qeyd edib.
İclasda səsləndirilmiş fikirlər əsasında İşçi qrup tərəfindən müvafiq təkliflər və qərarlar qəbul olunub.
Məlumat üçün qeyd edək ki, Biznes Mühiti və Beynəlxalq Reytinqlər üzrə Komissiyanın “Texnologiya və innovasiyalar” İşçi qrupuna rəhbərliyi Rəqəmsal İnkişaf və Nəqliyyat Nazirliyi həyata keçirir (https://azranking.az/az/working-groups).
Bölmənin digər xəbərləri
