REGİONLAR
Nazir müavini: Bu ildən etibarən Naxçıvanda geologiya sahəsi daha yaxşı fəaliyyət göstərəcək
Naxçıvan, 15 yanvar, Gülməmməd Əliyev, AZƏRTAC
Ötən ilin dördüncü rübündə yaradılan Ətraf mühitin mühafizəsi və təbii ehtiyatlardan istifadə üzrə dövlət fonduna 250 min manatdan çox vəsait daxil olub. Düşünürəm ki, bu ildən etibarən Naxçıvanda geologiya sahəsi daha yaxşı fəaliyyət göstərəcək və bu daxilolmalar daha da artacaq.
Bunu AZƏRTAC-ın Naxçıvan bürosuna açıqlamasında Naxçıvan Muxtar Respublikasının ekologiya və təbii sərvətlər nazirinin müavini Xanlar Mustafayev deyib.
O vurğulayıb ki, Naxçıvan Muxtar Respublikası ərazisində 55 qeyri-filiz faydalı qazıntı yatağı mövcuddur. Bu yataqlarda yenidən axtarış, təftiş və yenidən qiymətləndirmə işləri aparılıb. Qeyri-filiz faydalı qazıntı yataqlarında yenidən axtarış, təftiş və yenidən qiymətləndirmə işlərinin aparılmasında məqsəd ötən illərdə istismar olunan bir sıra yataqlarda qalıq ehtiyatı, eyni zamanda, nə qədər mineral xammalın mövcud olmasını dəqiqləşdirmək idi. 2023-cü ildə 30 qeyri-filiz faydalı qazıntı yatağında axtarış, təftiş və yenidən qiymətləndirmə işləri başa çatdırılıb, qalıq ehtiyatları hesablanıb.
Xanlar Mustafayev deyib: “Yerin təki haqqında qanunvericiliyə əsasən, Naxçıvanda ilk dəfə olaraq ötən il iyulun 7-də yer təkinin istifadəyə verilməsi ilə bağlı hərrac keçirilib. Nəticələr gözlədiyimizdən də yaxşı oldu. 2023-cü ildə keçirilən ümumilikdə 4 hərraca 24 hektar sahə çıxarılıb. Hazırda Ərəzin gips və Ordubadçay qum-çınqıl yataqlarının yanvarın 31-də hərraca çıxarılması ilə bağlı elan verilib”.
Onun sözlərinə görə, Ərəzin gips yatağında əvvəllər üstaçma işləri görülüb, amma istismar olunmayıb. Lakin bu gün həmin yatağa tələbat var. Ordubadçay qum-çınqıl yatağında 3 hektar sahə 15 ilədək istismara veriləcək. Start qiyməti 15 min manat təşkil edir. Beh məbləği isə start qiymətinin 10 faizi olmaqla, 1500 manat təşkil edir. Ərəzin gips yatağının 14 hektar sahəsi isə 25 ilədək istismara veriləcək. Start qiyməti 103 min 600 manat təşkil edir. Beh məbləği isə 10 min 360 manat təşkil edir. Hərracdan daxil olan vəsaitlər 2023-cü ildə yeni yaradılan Ətraf mühitin mühafizəsi və təbii ehtiyatlardan istifadə üzrə dövlət fonduna ödəniləcək.
Xanlar Mustafayev qeyd edib ki, “Dövlət sifarişi”nə uyğun olaraq filiz yataqlarında da axtarış-qiymətləndirmə işləri həyata keçirilir. İlkin olaraq ötən il Ağdərə-Nəsirvaz filizləşmə sahəsində buruq-qazma işlərinə başlanılıb. Böyük bir ərazini əhatə edən Ağdərə-Nəsirvaz filizləşmə sahəsinin Nəsirvaz hissəsində istismar işləri aparılmamış, Ağdərə hissəsində isə sovet dönəmində istismar işləri görülmüşdür. Prezidentin müvafiq Sərəncamı ilə təsdiq edilmiş “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nda prioritet yataqların müəyyənləşdirilməsi qeyd olunub və artıq həmin yataqlar müəyyənləşdirilib.
Nazir müavini kadr çatışmazlığı probleminə də toxunub: “Təəssüflər olsun ki, Naxçıvanda ali məktəblərdə “Geologiya” ixtisası mövcud deyil. Ona görə də kadr məsələləri ilə bağlı çətinliklər var. Biz bu məsələ ilə bağlı ötən ilin iyul ayında məsələ qaldırdıq. Müraciət etdik ki, belə bir ixtisas yenidən bərpa olunsun və Naxçıvanda geoloqlar yetişsin. Həmçinin geologiya sahəsində struktur dəyişikliyi apardıq, Geoloji Axtarış və Kəşfiyyat İdarəsinin adı dəyişdirilərək, “Geoloji və Mineral Xammal Ehtiyatlarından İstifadə Agentliyi” publik hüquqi şəxsi yaradıldı”.
Üç lot üzrə satınalmalar həyata keçirilib və malların böyük əksəriyyəti artıq təhvil verilib. Digər bir lot üzrə olan mallar isə yanvarın 31-dək təhvil verilməlidir. Buraya buruq-qazma maşını, qazma materialları və bütün texniki təchizat daxildir.
“Düşünürəm ki, görülən işlər nəticəsində bu ildən etibarən nazirlikdə geologiya sahəsi daha yaxşı fəaliyyət göstərəcək”,- deyə Xanlar Mustafayev əlavə edib.