NEFT EMALI MÜƏSSİSƏLƏRİNİN YANĞINDAN MÜHAFİZƏDƏSTƏSİNİN YENİ OBYEKTLƏRİ İSTİFADƏYƏ VERİLMİŞDİR
Fövqəladə Hallar Nazirliyinin ictimaiyyətlə əlaqə idarəsindən bildirmişlər ki, bu münasibətlə keçirilən mərasimdə iştirak edən nazir, general-polkovnik Kəmaləddin Heydərov yaradılan şəraitlə yaxından tanış olmuşdur. General-polkovnik Kəmaləddin Heydərova məlumat verilmişdir ki, 5 hissə və 1 bölmədən ibarət olan Yanğından Mühafizə Dəstəsinə 3 yanğınsöndürən avtomobil, 2 avtoçən, 1 ədəd köpük avtomaşını alınmışdır.
Həmin gün müasir avadanlıqla təchiz olunan Yanğından Mühafizə Dəstəsinin 18-ci Hərbiləşdirilmiş Yanğın Hissəsinin də açılış mərasimində iştirak edən fövqəladə hallar naziri, general-polkovnik Kəmaləddin Heydərov vəziyyətlə yerində tanış olaraq, bir sıra lazımi göstərişlərini vermişdir.
General-polkovnik Kəmaləddin Heydərov demişdir ki, Azərbaycan Prezidenti İlham Əliyevin ötən ilin dekabrında imzaladığı Sərəncama əsasən yaradılan Fövqəladə Hallar Nazirliyi işin səmərəsini artırmaqla əhalinin təhlükəsizliyinin etibarlı təminatına yönələn ciddi tədbirlər hazırlayıb həyata keçirir. Bu gün istifadəyə verilməsi mərasimlərində iştirak etdiyimiz obyektlər də həmin qəbildəndir. Bu obyektlərdə çalışan mütəxəssislər mühüm strateji dövlət müəssisələrində yanğın təhlükəsizliyinin təmin edilməsi üçün təxirəsalınmaz vəzifələri layiqincə yerinə yetirəcəklər.
Hər iki obyektin açılış mərasimində Azərbaycan Respublikası Dövlət Neft Şirkətinin prezidenti Rövnəq Abdullayev iştirak etmişdir.
