NEFTÇALA FERMERLƏRİ QARŞIDAKI PREZİDENT SEÇKİLƏRİNDƏ YALNIZ HEYDƏR ƏLİYEVƏ SƏS VERƏCƏKLƏRİNİ BİLDİRİRLƏR
Ona görə yox ki, möhtərəm Prezidentimiz fermerləri, kənd təsərrüfatı istehsalı ilə məşğul olan sahibkarları vergilərdən azad etmiş, sahibkarlığın inkişafı üçün əlverişli hüquqi baza yaradan mühüm sənədlər imzalamışdır. Ona görə ki, hamımız yaxşı bilirik, Azərbaycan Prezidenti Heydər Əliyev sadə zəhmət adamlarını həmişə dəstəkləmiş, onların qayğısına qalmışdır. Bu, danılmaz həqiqətdir. Ən əsası isə budur ki, respublikamızın ağır, çətin, böhranlı günlərində özünün uzaqgörən, müdrik siyasəti ilə ölkəmizi parçalanıb dağılmaq, məhv olmaq təhlükəsindən xilas etmiş, rüsvayçılıqdan qurtarmışdır. Yaxın keçmişimizi, 1993-cü ilə qədər olan fəlakətli dövrü unutmamışıq və unuda da bilmərik. AZƏRTAC-ın müxbiri ilə söhbətinə bu sözlərlə başlayan Neftçala Taxıl Açıq Səhmdar Cəmiyyətinin sədri, fermer Sabir Hüseynov rəhbərlik etdiyi yeni qurumun fəaliyyətindən danışaraq dedi ki, bu il 400 hektar sahədə taxıl yetişdirmişik. 60 hektarda arpa biçini başa çatdırılmışdır. Hər hektardan 20 sentner məhsul götürülmüşdür. Onun dediyinə görə, məhsuldarlıq bundan xeyli çox ola bilərdi. Lakin Kürün daşması, taxıl əkinlərinin bir hissəsinin su altında qalması məhsul itkisinə səbəb oldu. Təcrübəli fermer Cəmiyyətin gələcək planlarından da söz açdı. Dedi ki, fermerlərimiz bundan sonra əkin sahələrinin hamısında görkəmli seleksiyaçı alim Cəlal Əliyevin yüksək məhsuldar, xəstəliklərə davamlı, yerli şəraitdə daha çox taxıl verən buğda və arpa sortlarını əkməyi qərara almışlar. Eyni zamanda Səhmdar Cəmiyyətinin müasir əkin-biçin texnikası ilə təmin olunacağını, bunun üçün dövlətin fermerlərə ayırdığı güzəştli kreditlərdən istifadə ediləcəyini vurğuladı.
Bölmənin digər xəbərləri
