Nepalın paytaxtında tütün məmulatlarından istifadə qadağan edilib
Bakı, 14 dekabr, AZƏRTAC
Nepalın paytaxtı Katmanduda bütün növ tütün məmulatlarından istifadəyə, habelə onların satışına və saxlanmasına qoyulan qadağa qüvvəyə minib.
AZƏRTAC “The Himalayan Times” qəzetinə istinadla xəbər verir ki, qadağa tütün məmulatlarının tənzimləməsi barədə qanuna əsasən tətbiq olunub. Qərarın icrasına bələdiyyə polisi nəzarət edəcək.
Bundan sonra qadağaya əməl etməyən satış məntəqələrində tütün məmulatları dərhal müsadirə olunacaq. Eyni halın üçüncü dəfə təkrarlanacağı təqdirdə mağaza bağlanacaq.
Şəhər rəhbərliyi, həmçinin əhalini tütün məmulatlarına qoyulan qadağanın pozulması halları ilə bağlı qaynar xəttə zəng edərək məlumat verməyə çağırıb.
Bölmənin digər xəbərləri
