Nigar Arpadarai: Antalya Diplomatiya Forumu intellektual cəsarət ab-havası ilə fərq yaratdı
Antalya, 13 aprel, Günel Karatepe, AZƏRTAC
Bu il keçirilən Antalya Diplomatiya Forumu özünü yeni bir siyasi və intellektual platforma kimi təsdiqlədi. Tədbir, Avropa və Amerikanın bənzəri platformalarında tez-tez əksik olan, intellektual cəsarət ab-havası ilə fərq yaratdı. Tədbirin “Cənubi Qafqazda regional əməkdaşlıq: Gərginliklər və imkanlar” panelində Azərbaycan, Ermənistan və Gürcüstanın xarici işlər nazirləri bir araya gələrək Cənubi Qafqazdakı cari prosesləri müzakirə etdi, regional əməkdaşlıq yolunda mövcud maneələr haqda danışdılar. Burada Ermənistanın xarici işlər naziri Ararat Mirzoyanın erməni tərəfinin üslubunda standart oyun oynamaq qərarına gələrək, Azərbaycan konstitusiyasında erməni torpaqlarına iddiaların da olduğunu deməyə çalışdığı məqamı qeyd etmək istəyirəm. Lakin, o, fikrini, bunların nədən ibarət olduğunu izah edə bilmədi. Erməni nazirin tam əksinə, Azərbaycanın xarici işlər naziri Ceyhun Bayramov bu məsələyə çox gözəl açıqlıq gətirdi. Acınacaqlı hal ondan ibarətdir ki, çox vaxt Qərb platformalarında heç kim erməni arqumentlərinin doğruluğunu yoxlamır. Bu isə onları xeyli rahatladır. Lakin, Antalya forumunda Ermənistan tərəfinin bu cür cəhdləri uğursuz oldu.
Bu fikirləri AZƏRTAC-a müsahibəsində Milli Məclisin Beynəlxalq münasibətlər və parlamentlərarası əlaqələr komitəsi sədrinin müavini Nigar Arpadarai deyib.
Ötən bu üç gün ərzində bütün dünyanın gözünün Türkiyənin Antalya şəhərində olduğunu deyən müsahibimiz bildirib ki, artıq dördüncü dəfədir keçirilən Antalya Diplomatiya Forumu artan qlobal fikir ayrılıqları fonunda diplomatiyanın sabitləşdirici qüvvə kimi özünü yenidən təsdiqləməsi üçün aktual ehtiyacı əks etdirən “Parçalanmış dünyada diplomatiyanın bərpası” mövzusunu əhatə etdi.
“Forumda qlobal liderlər, siyasətçilər, alimlər, biznes ekspertləri, eləcə də vətəndaş cəmiyyətinin nümayəndələri bir araya gələrək, müxtəlif mövzular ətrafında müzakirələr apardı. Tədbirin əsas mövzuları bu dəfə daha da geniş spektri əhatə edərək, dünyadakı əsas geosiyasi məsələləri gündəmə gətirdi. Bu mövzular arasında regional təhlükəsizlik, iqtisadi əməkdaşlıq, Afrikanın dünya siyasətində artan rolu, Türk Dövlətləri Təşkilatının unikal modeli, təhsil, iqlim diplomatiyası və yeni dövrdə enerji təhlükəsizliyi, eləcə də Cənubi Qafqaz üçün çağırışlar və əməkdaşlıq imkanları kimi günümüzün aktual mövzular diqqət mərkəzində oldu”, - deyə o, bildirib.
Bölmənin digər xəbərləri
