Numan Kurtulmuş: Ankara Türk dünyasında sülhü, ədaləti və inkişafı təşviq etməyə çalışır
Ankara, 12 iyun, AZƏRTAC
Türkiyə regionda və beynəlxalq arenada davamlı sülhə töhfə verməyə yönəlmiş addımlarını davam etdirəcək. Ankara həm də Türk dünyasında sülhü, ədaləti və inkişafı təşviq etməyə çalışır.
AZƏRTAC xəbər verir ki, bu sözləri Türkiyə Böyük Millət Məclisinin (TBMM) sədri Numan Kurtulmuş Türk Dövlətləri Parlament Assambleyasının (TÜRKPA) Astanada keçirilən 14-cü plenar iclasında çıxışı zamanı deyib.
TBMM spikeri diqqəti dövrümüzün çağırışlarına və beynəlxalq münasibətlər sisteminin yenidən formatlaşdırılması fonunda bəşəriyyətin üzləşdiyi problemlərə yönəldib. “İkiqütblü dünya unudulub, bütün iddiaların əksinə olaraq, birqütblü dünya nizamının isə davamlılıq şansı yoxdur” -deyən N.Kurtulmuş qeyd edib ki, bu gün beynəlxalq münasibətlərdə hakim tendensiya çoxqütblü dünyaya aparan yolların axtarışıdır.
O, bu baxımdan, dövlətlər arasında əməkdaşlıq və həmrəyliyin artan əhəmiyyətinə diqqət çəkib. “Ölkələrimiz ətraf regionlardakı təhdidlər və münaqişələr fonunda ortaq gələcək qurmaq vəzifəsi qarşısındadır. Əgər bəyan etdiyimiz məqsədlərə çatmaq istəyiriksə, 300 milyonluq ümumi ailəmizin bütün üzvlərini əhatə etməli və birlikdə hərəkətə keçməliyik”, -deyə Türkiyə parlamentinin spikeri vurğulayıb.
N.Kurtulmuş Özbəkistan və Türkmənistanın da tezliklə TÜRKPA-ya üzv olacağına ümid etdiyini bildirib və artıq 17 illik tarixi olan TÜRKPA-nın nüfuzunu gücləndirmək üçün addımlar atmağa çağırıb.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
