Oğuz və Nova Qoritsa arasında əməkdaşlığın genişləndirilməsi müzakirə olunub
Vyana, 23 oktyabr, AZƏRTAC
Oğuz Rayon İcra Hakimiyyətinin başçısı Cavid Əbdul-Qədirovun Sloveniya Respublikasına səfər edib.
AZƏRTAC xəbər verir ki, səfər qardaşlaşmış Oğuz və Nova Qoritsa şəhərlərində müvafiq görüşlərin keçirilməsi və iki tərəfdaş şəhər arasında dostluq və əməkdaşlıq əlaqələrinin möhkəmləndirilməsi məqsədi daşıyıb.
Səfər çərçivəsində Cavid Əbdul-Qədirovun sloveniyalı həmkarı, Nova Qoritsa şəhərinin meri Samo Turellə görüşü keçirilib. Görüşdə Oğuz və Nova Qoritsa arasında mədəniyyət, turizm, təhsil, kənd təsərrüfatı daxil olmaqla müxtəlif sahələrdə əməkdaşlıq əlaqələrinin genişləndirilməsi, eyni zamanda, ətraf mühitin və su ehtiyatlarının qorunması və səmərəli idarə edilməsi ətrafında, eləcə də mümkün birgə layihələrlə bağlı fikir mübadiləsi aparılıb.
Daha sonra Cavid Əbdul-Qədirovun və Samo Turelin iştirakı ilə Azərbaycanın Avstriya və Sloveniyadakı səfiri Rövşən Sadıqbəyli tərəfindən Sloveniya-Azərbaycan Dostluq Cəmiyyətinin prezidenti Andrey Komparaya "Diaspor fəaliyyətində xidmətə görə" medalının təqdimetmə mərasimi baş tutub.
A.Kompara Azərbaycan və Sloveniya arasında ikitərəfli əlaqələrin inkişafında uzunmüddətli səmərəli fəaliyyətinə görə Diasporla İş üzrə Dövlət Komitəsinin qərarı ilə həmin medalla təltif edilib.
Səfər çərçivəsində Cavid Əbdul-Qədirov Mehdi Hüseynzadənin (Mixaylo) abidəsinin və xatirə muzeyinin yerləşdiyi Nova Qoritsanın Şempas qəsəbəsinə baş çəkib. O, Azərbaycanın qəhrəman oğlunun şərəfinə ucaldılmış abidə önünə əklillər qoyub, Mixaylonun xatirəsinə yaradılmış muzeylə tanış olub. Daha sonra Mixaylonun 1944-cü ilin noyabrında alman nasistləri ilə ağır döyüşdən sonra həlak olduğu Vitovlye kəndində olub, həlak olduğu ərazidə yerləşən xatirə lövhəsi önündə qəhrəmanın xatirəsi yad edilib.
Sonra Lyublyana şəhərinin meri Zoran Yankoviçlə görüş keçirilib və iki dost ölkə arasında şəhərlərarası əlaqələrin və əməkdaşlığın daha da genişləndirilməsi ətrafında fikir mübadiləsi aparılıb.
Həmçinin Nova Qoritsa və Vipava vadisi üzrə Turizm Şurasının baş direktoru Erika Loyk və Lyublyana Turizm Mərkəzinin rəhbər nümayəndələri ilə görüşlər keçirilib, turizm sahəsində mümkün əməkdaşlıq və təcrübə mübadiləsi müzakirə edilib.
Səfər çərçivəsində Sloveniyanın Maribor şəhərində yerləşən və müharibə qurbanlarının xatirəsinə ucaldılmış Dobrava Memorial Park Kompleksinin ərazisində Xocalı soyqırımı qurbanlarına həsr olunmuş xatirə lövhəsi ziyarət edilib və faciə qurbanlarının xatirəsi anılıb.
Xatırladaq ki, gələn il Azərbaycan və Sloveniya arasında diplomatik əlaqələrin qurulmasının 30 illiyi qeyd olunacaq.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
