Ölkəmizdə qida təhlükəsizliyi sahəsində 9,44 faiz irəliləyiş əldə olunub
Bakı, 17 mart, AZƏRTAC
Ölkəmizdə əhalinin təhlükəsiz və keyfiyyətli qida məhsullarına olan tələbatının davamlı təmin edilməsi, beynəlxalq ticarət bazarında yerli məhsulların imicinin daha da yaxşılaşdırılması, istehlakçıların sağlamlığının qorunması və hüquqlarının müdafiəsi, habelə gələcək nəsillərin sağlamlığının qorunması məqsədilə milli qida təhlükəsizliyi sisteminin möhkəmləndirilməsi qarşıya qoyulmuş əsas məqsədlərdəndir. Milli qida təhlükəsizliyi sisteminin möhkəmləndirilməsi və inkişafı üçün qida təhlükəsizliyi ilə əlaqədar göstəricilərin izlənilməsi və qanunvericiliyə uyğun olaraq ardıcıl nəzarət tədbirlərin həyata keçirilməsi zəruri əhəmiyyət kəsb edir.
Qida Təhlükəsizliyi Agentliyinin İnformasiya təminatı və innovativ həllər şöbəsindən AZƏRTAC-a verilən məlumata görə, bu sahədə beynəlxalq təcrübəyə uyğun və ölkə ərazisində mövcud qida təhlükəsizliyi problemlərinin ətraflı araşdırılması nəticəsində, ölkəmiz üçün prioritet hesab olunan 16 istiqamətdə ötən il üzrə qida təhlükəsizliyi sahəsində mövcud vəziyyəti əks etdirən sənəd tərtib olunub. Mövcud vəziyyətin vizual təqdimatını əks etdirən həmin sənədə əsasən ölkəmizdə 2020-ci ildə qida təhlükəsizliyi vəziyyəti müsbət istiqamətdə 9,44 faiz dəyişib.
Əldə olunan göstəricilərə əsasən 2019-cu illə müqayisədə hər hansı uyğunsuzluq, həmçinin nəticəsində inzibati xəta aşkarlanan yoxlamaların sayında müsbət dəyişiklik qeydə alınıb.
Eyni zamanda, qida təhlükəsizliyi ilə əlaqədar xüsusi təhlükəli hesab edilən bir sıra mikroorqanizmlərin qida məhsullarında aşkar edilməsi üzrə də müsbət istiqamətdə dəyişikliklər qeydə alınıb, nəticədə mikrobioloji təhlükəsizlik göstəriciləri baxımından məhsulların daha etibarlı olduğu müəyyən edilib.
Qeyd edək ki, qida məhsullarının rəqabət qabiliyyətini müəyyən edən əsas göstəricilərdən biri də ixrac zamanı idxalatçı ölkələr tərəfindən imtina prosedurlarının tətbiq edilib-edilməməsidir. Bu baxımdan 2020-ci il ərzində qida təhlükəsizliyi göstəriciləri üzrə yalnız bir imtina halı qeydə alınıb və 2019-cu illə müqayisədə 97 faiz müsbət istiqamətdə dəyişiklik baş verib.
Müsbət istiqamətdə baş verən dəyişikliklər sırasında qida zəhərlənmələri üzrə əldə olunan nəticələri də xüsusi qeyd etmək lazımdır. Belə ki, həm qida zəhərlənməsi hallarının, həm də zərərçəkənlərin sayı baxımından bu sahədə ötən ildə müvafiq olaraq 9 və 6 faiz azalma qeydə alınıb.
Bölmənin digər xəbərləri
